Halyqaralyq eńbek uıymy: Álemde jumyssyzdar sany 25 mıllıonǵa jetýi múmkin

JENEVA. QazAqparat - Halyqaralyq eńbek uıymynyń (HEU) pikiri boıynsha, COVID-19 pandemııasynan týyndaǵan ekonomıkalyq daǵdarys jáne eńbek naryǵyndaǵy ahýal búkil álem boıynsha jumyssyzdar sanynyń 25 mıllıonǵa jetýine, ıaǵnı jumyssyzdyq deńgeıiniń ósýine ákelýi múmkin. Bul týraly QazAqparat uıymnyń resmı saıtyna silteme jasap habarlaıdy.

«COVID-19 jáne eńbek salasy: saldary men qarsy sharalar» aldyn ala baıandamasy qyzmetkerlerdiń jumys ornynyń saqtalýyn qorǵaý, ekonomıka jáne jumyspen qamtýdy yntalandyrý, sondaı-aq jumys oryndary men tabystardy qoldaý sekildi úsh negizgi baǵytta shuǵyl, keń aýqymdy jáne úılestirilgen sharalarǵa shaqyrady.

Bul sharalarǵa áleýmettik qorǵaýdy keńeıtý, qyzmetkerlerdi alyp qalýdy qoldaý (ıaǵnı qysqa merzimdi jumys, aqyly eńbek demalysy, basqa da sýbsıdııalar) jáne mıkro, shaǵyn jáne orta kásiporyndar úshin qarjylyq, salyqtyq jeńildikter kiredi. Sonymen qatar, baıandamada bıýdjettik jáne aqsha-kredıt saıasaty, sondaı-aq ekonomıkanyń jekelegen salalaryn nesıeleý jáne qarjylyq qoldaý qarastyrylǵan.

Vırýstyń órshýiniń ekonomıkalyq áseri jumys ýaqyty men jalaqynyń qysqarýyna ákeletindikten, jumyssyzdar sany ósedi dep kútilýde.

Jumyspen qamtýdyń tómendeýi jumysshylar úshin úlken kiristiń joǵalýyn bildiredi. Mamandardyń baǵalaýynsha, 2020 jyldyń aıaǵynda olar 860 mıllıardtan 3,4 trıllıon dollarǵa jetedi. Bul taýarlar men qyzmetterdi tutynýdyń tómendeýine ákeledi, óz kezeginde bıznes pen ekonomıkanyń ósý perspektıvalaryna da áser etedi.