Halyqaralyq ekspedıtsııa Muztaýǵa elordanyń týyn tigedi

ÓSKEMEN. QazAqparat - Erteń BUU, Azııa Damý banki, Erýopa qaıta qurý jáne damý banki, «Qazaq Týrızm» ulttyq kompanııasy sııaqty uıym ókilderinen quralǵan ekspedıtsııa Muztaýǵa jolǵa shyǵady, dep habarlaıdy QazAqparat tilshisi.

Ekspedıtsııa músheleri sapar aldynda BAQ ókilderimen brıfıng ótkizdi. 30 adamnan quralǵan komanda 3 topqa bólinip, Katonqaraǵaı aýdanynyń eń kórikti jerleri týraly tanymdyq derekter jınamaqshy. Negizgi top Muztaý shyńyna órmelep, taý basyna bıyl 20 jyldyq mereıtoıy toılanyp jatqan Astana qalasynyń týyn tigýdi josparlap otyr. Olardy qazaqstandyq kásibı alpınıst Vasılıı Pevtsov bastaıdy.

«Álemde 8 000 metr bıiktike ottegi jabdyǵynsyz shyqqan 12 alpınıst qana bar. Sonyń biri - sizderdiń otandastaryńyz Vasılıı Pevtsov. Shyńǵa bizdi sol bastap júredi» - dedi Azııa Damý bankiniń Qazaqstandaǵy ókildiginiń dırektory Djovannı Kapanellı.

Bul ekspedıtsııa BUU-nyń óńirlerde ekotýrızmdi damytý baǵdarlamasy aıasynda uıymdastyrylmaq. Sapar barysynda Muztaý men Katonqaraǵaı ulttyq memlekettik tabıǵı parki týraly birneshe shaǵyn fılm túsirý kózdelgen.

«Eń negizgi fılm - Muztaý týraly 20 mınýttyq qysqametrajdy derekti fılm bolmaq. Qalǵandary Katonqaraǵaı halqynyń turmys saltyn, ózge de kórikti oryndaryn qamtıdy. Keıin ol fılmderdi National geographic sııaqty álemdik arnalar arqyly taratýǵa kúsh salamyz» - dei BUU-nyń Qazaqstandaǵy ókili Irına Gorıýnova.

Ekspedıtsııa joǵaryda atalǵan uıymdardyń demeýshiligimen, Katonqaraǵaı ulttyq memlekettik tabıǵı parkiniń atsalysýymen júzege aspaq.

Erteń jolǵa shyqqan ekspedıtsııa Muztaý shyńyna 5 kúnniń ishinde shyǵyp úlgeremiz dep otyr.


Foto: kk.wikipedia.org