Halyqaralyq eki baıqaýshy Atyraý oblysyndaǵy saılaý ýchaskesine bardy

ATYRAÝ. QazAqparat – Halyqaralyq eki baıqaýshy Atyraý oblysynyń Jylyoı aýdanyndaǵy saılaý ýchaskesine bardy, dep haarlaıdy QazAqparat tilshisi.

Jylyoı – Atyraý oblysyndaǵy turǵyny kóp aýdannyń biri. Bul aýdandaǵy 24 saılaý ýchaskesinde 58 684 saılaýshy tirkelgen.

Saılaý ýchaskelerinde múmkindigi shekteýli jandardyń júrip-turýyna qolaıly jaǵdaı jasaý úshin pandýs ornatylǵan. Múgedektigi bar 9 adam №99 saılaý ýchaskesinde tirkeýge alynǵan. Sondaı-aq, 18 jasqa endi tolǵan 31 saılaýshy bar. Bul ýchaskede saılaýshylarǵa qazaqtyń ulttyq taǵamy – baýyrsaq taratyldy.

Al, №101 ýchaske aýdan ortalyǵy – Qulsary qalasynda №16 D.Jazyqbaev atyndaǵy orta mektepte ornalasqan. Dál osy saılaý ýchaskesindegi daýys berýdi eki halyqaralyq baıqaýshy baqylap otyr.

Onyń biri Shvetsııa Respýblıkasynyń azamaty Talberg Bo Pontýs, ekinshisi – Kanadadan kelgen Perıs Delshanı Esodaran.

«Biz saılaý barysyn baqylaý úshin alystaǵy Jylyoı aýdanyn tańdadyq. Óıtkeni, bizdi elordadan shalǵaıdaǵy saılaýshylardyń belsendiligi qyzyqtyrady. Demokratııalyq qoǵam qurýǵa umtylǵan eldegi turǵyndardyń kóńil-kúıin kórgimiz keldi. Búgin biz kelip otyrǵan saılaý ýchaskesinde daýys berý talapqa saı ótip jatyr. Zań buzýshylyq baıqalǵan joq», -deıdi halyqaralyq baıqaýshynyń biri Talberg Bo Pontýs.

Eske sala ketelik, buǵan deıin Atyraý turǵyndary 261 saılaý ýchaskesinde tańdaýyn jasaıtynyn habarlaǵan bolatynbyz.