Halyqaralyq donorlarǵa bizdiń elde esh shekteý jasalmaıdy - E.Nurǵalıeva
ASTANA. QazAqparat - TMD elderi ishinde Qazaqstannyń úkimettik emes uıymdardyń qyzmetin retteıtin zań eń lıberaldy bolyp tabylady. Ortalyq kommýnıkatsııalar qyzmetinde ótken brıfıngte zań ǵylymdarynyń doktory, professor, «Eýrazııalyq quqyq qorǵaý ortalyǵy» qoǵamdyq qorynyń prezıdenti Eńlik Nurǵalıeva úkimettik emes uıymdardyń qyzmeti týraly zań bolashaqta odan ári jetildiriletindigin habarlady.
«TMD elderi ishinde Qazaqstannyń úkimettik emes uıymdardyń qyzmetin retteıtin zańy eń lıberaldy der edim. Birinshiden, olardy tirkeý kezinde qandaı salada jumys jasaıtynyn kórsetpeıdi. Bir salada, eki salada jumys isteı me, oǵan eshqandaı talap qoıylmaıdy. Halyqaralyq standarttarǵa qaraıtyn bolsaq, onda olar qandaı salada jumys jasaıtyndyqtaryn kórsetýleri tıis. Bizde qandaı baıqaýǵa qatysqysy keledi, sol salaǵa qujat tapsyryp, baıqaýǵa emin-erkin qatysa alady. Bizdiń zańdardyń lıberaldylyǵy osy jerde kórinedi. Ekinshiden, qarjylandyrý máselesi. Qarjylandyrý alǵan uıym úkimetke eshqandaı esep bermeıdi. Tek salyq týraly jáne statıstıkalyq eseptilikti beredi. Qarjyny qaıda jumsaǵanyn tıyn-tebenine deıin kórsetpese, eshqandaı jaýapkershilikke tartylmaıdy. Árıne, qadaǵalap otyratyn organdar bar, olar eshbir júgensiz ketti dep aıtýǵa bolmaıdy. Biraq AQSh nemese Reseı elderindegideı, barlyq tıynyna deıin sanaıtyndaı, sonshalyqty qatań sharalar qoldanylmaıdy», - dedi ol.
Sonymen qatar «Qazaqstannyń azamattyq alıansy» elde on jyl buryn qabyldanǵan «Áleýmettik tapsyrystar týraly» zańdy jetildirý úshin tolyqtyrýlar men ózgerister engizý týraly jańa zań jobasyn jasady. Qazir ol ortalyq memlekettik organdarda qaralýda. E.Nurǵalıevanyń sózine qaraǵanda, ol zań jobasy halyqaralyq standarttarǵa sáıkes jasaldy. Sondaı-aq ol halyqaralyq donorlardyń qyzmetine qatysty jańa shekteýler bolmaıtyndyǵyn aıtty.
«Halyqaralyq donorlarǵa bizdiń elde esh shekteý jasalmaıdy. Olarǵa senimmen qaraıdy. 2014 jyly qarasha aıynda halyqaralyq donorlardyń tizimi keńeıtilgen bolatyn. Sondyqtan úkimettik emes uıymdar halyqaralyq donorlar arqyly qarjylandyryla alady. Biraq eger olardyń isi memleket jáne azamattarymyzdyń múddesine qaıshy kelse, olarǵa shekteý jasalady. Halyqaralyq qarajattar Qazaqstanǵa qajet. Biraq olar áleýmettik salalarǵa, muqtajdyq bar jerge baǵyttalýy tıis», - deıdi zańger.
«Eýrazııalyq quqyq qorǵaý ortalyǵy» qoǵamdyq qory úkimettik emes uıymdardyń qyzmetin retteıtin zańdardyń olqylyqtaryn zerttep, monıtorıngilep kelgen uıymdardyń biri. Jańa zańnyń jobasyn jasaqtaýǵa qoǵamdyq sarapshylar retinde atsalysty.
