Halyqaralyq Bıznes Akademııasynyń túlekterine "Master of Business Administration" dıplomdary tabystaldy
ALMATY. 1 Qarasha. QazAqparat /Názıra Eleýhan/ - Almatyda Abaı atyndaǵy Memlekettik opera jáne balet teatrynda Halyqaralyq Bıznes Akademııanyń "Master of Business Administration" dıplomdaryn tabys etý rásimi bolyp ótti.
Magıstr dıplomyn akademııanyń 238 túlegi aldy. Almaty qalasynyń túlekterimen qatar, Astana qalasynan -35, Pavlodar qalasynan -14, Óskemennen - 20 jáne qashyqtyqtan oqý túri boıynsha 35 magıstrant dıplom ıesi atandy. Onyń 83-i oqýdy úzdik dıplommen támámdaǵan. Halyqaralyq Bıznes Akademııasynyń rektory Asylbek Qojahmetovtyń aıtýynsha, bul úlken jetistik.
Saltanatty rásimde sóz sóılegen rektor "Jahandaný dáýirinde básekege qabiletti, parasatty, oı-órisi keń, jańasha paıymdap, jańasha oılaıtyn bilikti de, bilimdi mamandardyń jańa tolqyndarynyń qataryna qosylyp otyrsyzdar. Uly aǵartýshy Ybyraı Altynsarın: Mal dáýlettiń baılyǵy, bir juttan-aq joq bolar, óner, bilim baılyǵy kúnnen kúnge mol bolar degendeı, sizderdiń bilimderińiz arta bersin!",-dep óz tilegin bildirdi.
Onyń aıtýynsha, oqýǵa túsken 300 adamnyń 80 paıyzy bitirip shyqqan. "Halyqaralyq Bıznes Akademııasynda oqý zor qarymdy eńbek pen shynaıy talapty qajet etedi. Akademııa daǵdarysqa qaramastan "№1-shi bıznes-mektep" dárejesin saqtap qaldy. Bıyl bizdiń oqý orynǵa bıznes salasynda sapaly bilim berý jetistigi boıynsha Ortalyq jáne Shyǵys Eýropadaǵy Menedjmentti damytýdyń eýropalyq ınstıtýtsıonaldy akkredıtatsııasy berildi. Sonymen qatar qyrkúıek aıynda akademııa Qazaqstan tutynýshylary Ulttyq Lıgasynyń "Kirshiksiz" ulttyq sapa belgisimen marapattaldy jáne jaqynda Akademııa Eýropa ýnıversıtetteriniń Uly hartııasyna qosyldy",-dedi Halyqaralyq Bıznes Akademııasynyń rektory Asylbek Qojahmetov.
Onyń aıtýynsha , Halyqaralyq Bıznes Akademııasy bıyl jańa mamandyqtar boıynsha úsh lıtsenzııa alǵan. Olar - "Baǵalaý", "Meıramhana isi jáne qonaqúı bıznesi" jáne "Logıstıka".
Atalmysh sharaǵa arnaıy kelgen, Shveıtsarııa bıznes mektebiniń ókili Kosımovskaıa Elena túlekterdi qýanyshty sátterimen quttyqtap: "Qazaqstan álemniń 129 eli boıynsha bilim ındeksinen 1 orynda. El JOO-da jarty mln. stýdent oqıdy, onyń 20 paıyzy memlekettik tapsyrys boıynsha oqıtyndar. Memleket 80 paıyzyna óz ınvestıtsııasyn salady. Bul elderińizdi maqtan tutatyn jaǵdaı", -dep atap ótti.
Saltanatty sharaǵa qala ákiminiń orynbasary Serik Seıdýmanov, bilim mınıstrliginiń ókilderi jáne Akademııanyń Qamqorshylar keńesiniń músheleri qatysty.
