Halyqaralyq baıqaýshy: Qazaqstandyqtar erikti túrde daýys berip jatyr

ASTANA. QazAqparat – Palestına memleketiniń Qazaqstandaǵy Tótenshe jáne Ókiletti Elshisi, Qazaqstandaǵy tirkelgen dıplomatııalyq korpýstyń Dýaıeni Montaser Abý Zeıd kezekten tys Prezıdent saılaýynyń uıymdastyrylýy týraly pikir bildirdi, dep habarlaıdy QazAqparat tilshisi.

«Biz tańnan beri 13 ýchaskege baryp shyqtyq jáne daýys berý protsesi óte jaqsy, joǵary deńgeıde uıymdastyrylǵanyn kórdik. Eshqandaı zańsyzdyq baıqaǵan joqpyz. Adamdar jaqsy kóńil kúımen, erikti túrde, eshbir qysymsyz daýys berip jatyr. Jergilikti baıqaýshylardan eshqandaı shaǵym alǵan joqpyz», - dedi halyqaralyq baıqaýshy.

Aıtýynsha, ol osymen úshinshi ret qazaqstandyqtardyń daýys berý protsesine baıqaýshy retinde qatysyp otyr.

«Men Qazaqstanda osymen tórtinshi ret Prezıdent jáne Parlament saılaýynda, Referendýmda halyqaralyq baqylaýshy retinde qatysyp otyrmyn. Qazaqstan halqyn qazir elde júrgizilip jatqan tabysty ekonomıkalyq jáne saıası refmormalarmen quttyqtaǵym keledi. Sondaı-aq, Qazaqstanǵa bebitshilik, gúldený jáne qaýipsizdik tileımin», - dedi Elshi.

Búgin elimizdegi 86 ýchaskede daýys berý ózge ýchaskelerden 1 saǵat buryn bastaldy.

Ortalyq saılaý komıssııasynyń bergen málimetine súıensek, elimizde daýys berý quqyǵy bar 11 827 277 azamat tirkelgen. Olar respýblıka aýmaǵynda ornalasqan 10 101 saılaý ýchaskesinde daýys beredi. Al 53 shet memlekettegi 68 ýchaskede 12 527 Qazaqstan azamatyna daýys berý múmkindigi jasalǵan.

Buǵan deıin OSK kezekten tys Prezıdent saılaýynyń barysyn 641 halyqaralyq baıqaýshy qadaǵalaıtynyn málim etken edi.