Halyqaralyq bankter ınvestıtsııalyq jobalardy birlese qarjylandyrýǵa 7,5 mlrd dollar quıady - E. Dosaev
«Memleket basshysynyń tapsyrmasyna sáıkes, Ulttyq qordan bólingen 1 trıllıon teńge esebinen ekonomıkanyń ósýin qosymsha yntalandyrý sharalary qamtamasyz etildi. Bıyl ekonomıkalyq ósýdi qamtamasyz etýge 500 mlrd. teńge bólinip otyr. Onyń ishinde shaǵyn jáne orta bıznesti qoldaýǵa - 100 mlrd. teńge, bank sektoryn saýyqtyrýǵa - 250 mlrd. teńge jáne ındýstrııalyq-ınnovatsııalyq damý jobalaryn iske asyrýǵa - 150 mlrd. teńge jumsalady», - dedi Áleýmettik-ekonomıkalyq saıasat jol kartasynyń oryndalý nátıjelerine toqtalǵan mınıstr Erbolat Dosaev. Onyń aıtýynsha, Ulttyq qordan bólinetin qarajatty tıimdi paıdalaný úshin Úkimet birqatar halyqaralyq qarjy uıymdarymen ınstıtýtsıonaldy jáne qarjylaı demeý boıynsha kelisimderge qol qoıǵan. Olardyń arasynda Dúnıejúzilik bank, Azııa Damý jáne Qaıta Qurý banki, Eýrapa Qaıta Qurý jáne Damý Banki jáne Islam Damý banki bar. «Osy halyqaralyq bankter ekonomıkanyń negizgi salasyndaǵy ınvestıtsııalyq jobalar men basym baǵdarlamalardy birlese qarjylandyrýdy qamtamasyz etedi. Bular 2014-2016 jyldar aralyǵynda júzege asatyn bolady. Birlese qarjylandyrýdyń jalpy mólsheri 7,5 mlrd. dollarǵa deıin», - dedi Erbolat Dosaev.
Budan bólek, mınıstr Jol kartasy aıasynda júıe qurýshy kásiporyndardyń úzdiksiz jumys isteýin qamtamamasyz etý maqsatynda óndirý jaǵdaıy aýyr jáne rentabeldiligi tómen ken oryndary úshin Úkimet alǵashqy ret paıdaly qazbalar óndirisine salynatyn salyqtyń tómendetilgen mólsherlemesin belgilegenin atap ótti. Sonymen qatar, eksporttaýshylardy qoldaý úshin temirjol kóligimen tasymaldaýǵa arnalǵan tarıfterge ýaqytsha tómendetý koeffıtsıentterin berý tetigi engizilgen.
