Halyqaralyq bank sarapshylary esepteý ádisine josparlaýdyń kóshýine qatysty konsýltatsııa ótkizdi
ASTANA. QazAqparat - Halyqaralyq valıýta qory men Azııa damý bankiniń quzyretti mamandarynyń biri halyqaralyq konsýltanttar Djon Zohrab (Kavkaz óńiri, Ortalyq Azııa jáne Qazaqstan Respýblıkasy boıynsha HVQ óńirlik keńesshisi) pen Ken Ýorren (ADB konsýltantty, Jańa Zelandııa Qarjy mınıstriniń keńesshisi) esepteý ádisine bıýdjettik josparlaýdyń kóshýi boıynsha jalpy tásilderdi anyqtaý úshin konsýltatsııalar ótkizdi.
Oǵan Qarjy mınıstrliginiń, Ulttyq ekonomıka mınıstrliginiń, Densaýlyq saqtaý jáne áleýmettik damý mınıstrliginiń, Esep komıtetiniń ókilderi qatysty. Bul týraly Qarjy mınıstrliginiń baspasóz qyzmetinen habarlandy.
Mıssııa barysyndaǵy sarapshylarmen Qarjy vıtse-mınıstri Rýslan Dálenov kezdesip, onda reformany qoldaý boıynsha mınıstrlik pen yntymaqtastyqty damytý jónindegi múddelerge nazar aýdaryldy.
Sonymen qatar, halyqaralyq konsýltanttar bıýdjettik josparlaý máselelerimen aınalysatyn ortalyq memlekettik organdardyń mamandaryna arnaıy semınar uıymdastyrdy. Onda Ekonomıkalyq yntymaqtastyq jáne damý uıymy elderiniń halyqaralyq tájirıbesi negizinde ádistiń negizgi tujyrymdamalary jáne qaǵıdattary tanystyryldy. Sondaı-aq, mıssııa sheńberinde Qarjy mınıstrligi men Ulttyq ekonomıka mınıstrliginiń Jumys tobynyń otyrysy ótip, onda halyqaralyq konsýltanttar bıýdjettik josparlaý salasynda mamandardy praktıkalyq oqytýdy ótkizdi.
Aıta keteıik, bıýdjettik josparlaý satysynda esepteý ádisine kóshýdi júzege asyratyn Avstrııa, Shveıtsarııa, Avstralııa, Jańa Zelandııa, Kanada sııaqty elderdiń tájirıbeleri osy máseleniń egjeı-tegjeıli zerdelenýi men ádisnamalyq pysyqtalýy qajettigin kórsetedi.
