Halyqaralyq baǵyttarǵa bılet alý reıstiń ushýyna kepildik bermeıdi – Azamattyq avıatsııa komıteti
NUR-SULTAN. QazAqparat – QR IIDM Azamattyq avıatsııa komıteti halyqaralyq baǵyttarǵa áýe bıletterin satyp alý jóninde málimdeme jasady, dep habarlaıdy QazAqparat.
«Áýe kompanııalary men deldaldardyń saıttarynda halyqaralyq baǵyttarǵa bılet satylyp jatqanyna baılanysty, bıletter birneshe aı buryn satylatyn álemdik tájirıbeni eskere otyryp, halyqaralyq reısterge bılet satýdyń rettelmeıtinin jáne shektelmeıtinin habarlaımyz. Osyǵan baılanysty halyqaralyq baǵyttar boıynsha Qazaqstannan ushatyn nemese elge keletin áýe bıletterin satý jáne satyp alý halyqaralyq reısterdiń qaıta bastalǵanyn bildirmeıdi jáne jolaýshyǵa tańdap alynǵan baǵyt pen reıs kúni ushýǵa kepildik bermeıdi», - delingen málimdemede.
Komıtettiń habarlaýynsha, halyqaralyq baǵyttar boıynsha turaqty jolaýshylar reısterin qaıta bastaý epıdemıologııalyq jaǵdaıǵa, Qazaqstan men shet elderdiń memlekettik shekarasynan ótý shekteýlerine jáne memleketterdiń vızalyq talaptaryna tikeleı baılanysty.
Halyqaralyq áýe qatynastaryn qaıta bastaý týraly sheshimdi QR aýmaǵynda koronavırýstyq ınfektsııanyń paıda bolýy men taralýyna jol bermeý jónindegi vedomstvoaralyq komıssııa QR Densaýlyq saqtaý mınıstrliginiń usynymdaryn eskere otyryp qabylaıdy.
