Halyqaralyq baǵdarlamalar ortalyǵy men QSZI sarapshylar daıarlaýda yntymaqtasýǵa ýaǵdalasty (FOTO)

ASTANA. QazAqparat - Búgin Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýty (QSZI) men «Halyqaralyq baǵdarlamalar ortalyǵy» AQ Yntymaqtastyq jóninde memorandým jasasty.

Qujat ǵylymı-tájirıbelik yntymaqtastyqty arttyryp, odan ári keńeıtýge, qazaqstandyq sarapshylardyń álemniń beldi ǵylymı ortalyqtarynda kásibı biliktiligin shyńdaý úshin «Bolashaq» baǵdarlamasyna qatysýyn jandandyrýǵa baǵyttalǵan.

QSZI men HBO aqparat almasý úshin jumys kezdesýlerin, birlesken ǵylymı konferentsııalar, semınarlar, dóńgelek ústelder, pikir almasý alańdaryn, ózara konsýltatsııalar ótkizýdi, birlesken jarııalanymdar daıyndaýdy, halyqaralyq ǵylymı baǵdarlamalar men jobalardy ázirleý men júzege asyrýda ekijaqty qoldaý kórsetýdi, birlesken zertteýler júrgizýdi josparlap otyr.

Memorandým jasasý saltanaty aıasynda «Halyqaralyq baǵdarlamalar ortalyǵy» AQ ókilderi kompanııanyń qyzmeti jáne QR Prezıdentiniń «Bolashaq» halyqaralyq stıpendııasynyń negizgi baǵyttary týraly tanystyrylymdy uıymdastyrdy.