Halyqaralyq áıelder kúnine oraı mádenıet mekemeleri túrli merekelik sharalar ótkizedi
ASTANA. 2 naýryz. QazAqparat - «Qazaqstan Respýblıkasynyń Mádenıet jáne aqparat mınıstrligi respýblıkamyzdyń áıelder qaýymyn 8 naýryz - Halyqaralyq áıelder kúnimen quttyqtap,
mereke kúnderi Almaty jáne Astana qalalarynyń mádenıet mekemelerine merekelik qoıylymdardy tamashalaýǵa shaqyrady»,-dep habarlaıdy mınıstrliktiń baspasóz qyzmeti.
Merekelik baǵdarlama áıelder qaýymynyń talǵamyna oraı eń úzdik týyndylardan quralady. Bul kúnderi operalyq men dramalyq teatrlar, kontserttik uıymdar óz esikterin kelem deýshilerge aıqara ashady. Operalyq teatrlar kórermenderge opera jáne balet óneriniń eń ozyq úlgilerin, al dramalyq teatrlar otandyq jáne sheteldik avtorlardyń úzdik spektaklderin kórsetedi. Kontserttik uıymdarda jetekshi shyǵarmashylyq ujymdar men jeke oryndaýshylardyń oryndaýynda klassıkalyq jáne halyqtyq janrlardyń úzdik shyǵarmalary shyrqalady. Al 8 naýryz kúni K.Baıseıitova atyndaǵy opera jáne balet teatrynda belgili arııalar men balettik nómirlerden turatyn «Mýzykalyq qonaqjaı» atty merekelik kontsert ótedi.
