Halyqaralyq avtosherýge qatysýshylar Kókshetaýda boldy
KÓKShETAÝ. QazAqparat - Tájik-aýǵan shekarasyndaǵy TMD-nyń syrtqy shekarasyn kúsheıtý maqsatynda jeke quramdaǵy atqyshtar batalonynyń qurylǵanyna 26 jyl tolýyna uıymdastyrylǵan halyqaralyq avtosherýge qatysýshylar Kókshetaýda boldy, dep habarlaıdy QazAqparat tilshisi.
Táýelsizdik alańynda ótken saltanatty shara Aqmola oblystyq polıtsııa departamenti bólimshesiniń, Kókshetaý tehnıkalyq ınstıtýty jáne №5510 ásker bólimniń sarbazdary men kýrsanttarynyń sap túzeýimen bastaldy.
Sharada Kókshetaý qalasy ákiminiń orynbasary Altynaı Ámirenova, «Tájik-aýǵan shekarasyndaǵy áskerı qaqtyǵystarǵa qatysýshylardyń» respýblıkalyq qoǵamdyq birlestiginiń tóraǵasy Murat Muhamedjanov, «Sangı-Kabýd» tájik ulttyq-mádenı ortalyǵynyń tóraǵasy Ýmar Shonazarov, «Aýǵan soǵysy ardagerleri men múgedekteriniń qaýymdastyǵy» qoǵamdyq uıymynyń tóraǵasy Dýanbaı Ybyraı jáne Tájikstan aýmaǵynda kóz jumǵan qazaqstandyq jaýyngerdiń anasy Janat Bekebaeva sóz alyp, tarıhı data týraly aıtyp berdi.
«Tájik-aýǵan shekarasynda janqııarlyqpen erlik kórsetken batyrlardyń qurmetine tuńǵysh ret halyqaralyq avtosherý uıymdastyryp otyrmyz. Sharanyń maqsaty – óskeleń órenderge batyrlardyń erligin nasıhattaý. Bizdiń jaýyngerler erlikpen shaıqasty. Avtosherýimiz Kókshetaý qalasynan bastaý aldy. Alda Nur-Sultanǵa jáne odan ári attanamyz», - deıdi Murat Muhamedjanov.
Al, «Aýǵan soǵysy ardagerleri men múgedekteriniń qaýymdastyǵy» qoǵamdyq uıymynyń tóraǵasy Dýanbaı Ybyraı tájik-aýǵan shekarasynda áskerı boryshyn ótegen jaýyngerlerdiń árbir izgi isteri urpaqqa úlgi ekenin atap ótti. Olardan ónege alyp, bolashaqta elin, jerin, Otanyn qorǵaıtyn jastardy tárbıeleý máselesine nazar aýdardy.
Budan ári Kókshetaýǵa aıaldaǵan halyqaralyq avtosherýge qatysýshylar Nur-Sultan qalasyna attandy.
Aıta ketý kerek, halyqaralyq kelisimderge sáıkes, osydan týra 26 jyl buryn qazaqstandyq jaýyngerler tájik-aýǵan shekarasyna áskerı mindetin óteýge bardy. Tájik-aýǵan shekarasyndaǵy Pshıhavr shatqalynda bolǵan urys áli umytyla qoıǵan joq. Sol 1995 jyly bolǵan qandy oqıǵada 17 qazaqstandyq jaýynger sheıit bolyp, 30-dan astamy aýyr jaralanǵan edi.
