Halyqaralyq avıatsııa komıtetiniń komıssııasy Bishkektegi Boeing apatyn tekserýdi bastady
BІShKEK.QazAqparat - Halyqaralyq avıatsııa komıtetiniń (HAK) komıssııasy «Manas» áýejaıy mańyna qulaǵan «Boıng-747» júk ushaǵy apatyn tekserýdi bastady, dep habarlaıdy «QazAqparat» HAA Bishkektegi menshikti tilshisi. Bul týraly Qyrǵyzstan TJM baspasóz qyzmeti málimdegen.
«Qyrǵyzstan múshelik etetin azamattyq avıatsııa jáne áýe keńistigin qoldaný týraly memleketaralyq kelisim men eldiń avıatsııalyq zańnamasy negizinde HAK komıssııasy QR ókilderiniń qatysýymen áýe apatyna tehnıkalyq tekseris júrgizýdi bastady», - delingen habarlamada.
Halyqaralyq qujattarǵa sáıkes oǵan Túrkııa (áýe kemesin tasymaldaýshy jáne tirkeýshi memleket retinde) jáne AQSh (laıner men qozǵaltqyshty jasap shyǵarýshy el) ókilderi qatysýda. Tehnıkalyq komıssııa apat saldaryn joıý jáne zardap shekkender men marqum týystaryna kómek kórsetý jónindegi Qyrǵyzstan úkimettik komıssııasymen tyǵyz baılanysta jumys istep jatyr.
Eske sala ketsek, 16 qańtarda saǵat tańǵy 7.31-de Bishkektiń Dacha-Sýý aýylynda áýejaıǵa jaqyn jerde Gonkongten Túrkııaǵa bet alǵan júk ushaǵy qulady. Apat saldarynan 37 adam qaza tapqan.
17 qańtar Qyrǵyzstanda aza tutý kúni bolyp belgilendi.
