Halyqaralyq áýejaıǵa Hıýaz atyn berý týraly bastama qaıta kóterildi
Ekinshi dúnıejúzilik soǵysta erekshe erlik kórsetken Hıýaz Dospanova týraly keıingi jyldary baspasózde az jazylyp júrgen joq. Biraq, ol týraly kitap jarytymsyz eken. Tusaýkeser barysynda sóz alǵan belgili synshy, «Alash» ádebı syılyǵynyń ıegeri Álııa Bópejanova Hıýaz apamyzdyń ǵajaıyp erlikter kórsetip elge oralǵanyn, elge kelgen soń da partııa qatarynda qyzmet etkenin, biraq ómirinde eshqashan maqtanbaǵanyn, ózin kórsetýge umtylmaǵanyn basa aıtty. «Bizde ıdeologııa joq deıdi. Jastar kimge elikteıdi dep jatady. Jastar Hıýazdaı apalaryna eliktep ósse bolady dep aıtar em. Bul kisi Keńes Odaǵy kezinde onsha eskerilmedi. Tek táýelsizdikten soń ǵana Dospanova esimi aıtyla bastady. Halyq Qaharmany ataǵy berildi»-degen synshy Atyraýdaǵy Halyqaralyq áýejaıdy Hıýaz Dospanova atyna berilse eken degen zııalylardyń tilegin jetkizdi. Bul bastama osydan tórt jyl buryn kóterilgen bastama eken. Ázirge toqtap tur.
Aıta keteıik, Hıýaz Qaıyrqyzy soǵys jyldarynda orystyń ataqty ushqysh qyzy Marına Raskovanyń 46-gvardııalyq túngi bombalaýshylar ushqyshtar polkiniń quramynda boldy. «Tún perileri» dep ataǵan olardy óltirgenderge nemis áskerıleriniń tek qaharmandyq kórsetkenderge ǵana beriletin temir krest ordenimen marapattalatyny soǵys jyldarynda ańyzǵa aınalǵan. Jaý shebin talqandaý úshin 300 márte áýeden soqqy berip, jaýyngerlik tapsyrmany múltiksiz oryndaǵan. Al, «Hıýaz» atty kitap Atyraý oblystyq mádenıet, muraǵat jáne qujattama basqarmasynyń qoldaýymen shyǵyp otyr. Kitapty qurastyrǵan belgili jýrnalıst - Tursyn Qalımova.
