«Halyqaralyq Armııa oıyndary - 2018»: QR Qarýly Kúshteri komandasy úzdik úshtikke endi

ASTANA. QazAqparat - Máskeýdegi «Alabıno» polıgonynda ótken IY Halyqaralyq Armııa oıyndarynyń saltanatty jabylý rásimine QR Qorǵanys mınıstri Nurlan Ermekbaev qatysty, dep habarlaıdy atalǵan vedomstvonyń baspasóz qyzmeti.

Saıys qorytyndysy boıynsha Qazaqstan Respýblıkasynyń Qarýly Kúshteriniń quramasy jalpy komandalyq úshinshi oryndy ıelendi, birinshi orynda Reseı Federatsııasynyń komandasy jáne ekinshi orynǵa Qytaı Halyq Respýblıkasynyń áskerı qyzmetshileri jaıǵasty.

Qazaqstannyń komandasyn uıymdastyrýshylar kórnekilerdiń biri dep tanyǵanyn aıta ketken jón. Oıynnyń tóreshiler alqasynyń músheleri QR QK áskerı qyzmetshileriniń joǵary daıyndyq deńgeılerin, kásipqoılyqtary men jaýyngerlik mashyqtaryn atap ótti. Qazaqstandyq armııanyń abyroıy men bedeli úshin túrler men ásker tekteriniń, «Astana», «Ońtústik», «Batys», «Shyǵys» óńirlik qolbasshylyqtarynyń 300-ge jýyq áskerı qyzmetshisi halyqaralyq arenada baq synasty. Qazaqstan quramasynyń qorjynynda 4 altyn, 4 kúmis jáne 4 qola medal bar.

Odan basqa, jabylý saltanaty sheńberinde QR Qorǵanys mınıstri N. Ermekbaev Reseı qorǵanys vedomstvosynyń basshysy, armııa generaly S. Shoıgýmen kezdesý ótkizdi. Onyń barysynda taraptar ári qaraıǵy ekijaqty áskerı yntymaqtastyq máselelerin talqylady.