Halyqaralyq ana tili kúnine oraı keden qyzmetkerleri arasynda baıqaý ótti
ALMATY. 22 aqpan. QazAqparat - Almatyda qalalyq kedendik baqylaý departamentinde «Ózge tildiń bárin bil, óz tilińdi qurmette» degen taqyrypta baıqaý ótti. Ol Halyqaralyq ana tili kúnine oraı uıymdastyryldy.
Onda talapkerler úsh atalym boıynsha ózderiniń boıyndaǵy bar ónerlerin ortaǵa saldy. Birinshisi, «Ónerimen órge júzgen» dep ataldy. Bul synda Kedendik baqylaýdy uıymdastyrý basqarmasynyń qyzmetkerleri Dına Ábisheva men Raýan Toıshymanova ózderiniń júrekterinen shyqqan sazdy áýenderin oryndap, «Býyn» bıin myń burala bılep kórermendi erekshe tánti etti. «Ásem kıim - adam kórki» dep atalatyn ekinshi atalymda, qazaqtyń ulttyq kıimderiniń árbir oıý-órneginiń maǵynasyn túsindirip, kórsetken Postkedendik baqylaý basqarmasynyń qyzmetkeri Gaýhar Aınabekova men Kedendik baqylaýdy uıymdastyrý basqarmasynyń ókili Edige Baıdáýletov kózge tústi. Al qazaq aqyndarynyń óleńderin naqyshyna keltirip mánerlep oqýda Táýekelderdi taldaý jáne statıstıka bólim qyzmetkeri Ulan Erjanuly men Qarjy jáne materıaldyq, tehnıkalyq qamtamasyz etý bóliminiń qyzmetkeri Erkebulan Zulqarnaev barlyq qarsylastarynan basym tústi. Baıqaý sońynda úzdik keden qyzmetkerleri arnaıy daıyndalǵan syılyqtarǵa ıe bolyp, qazylar alqasynyń qurmet madaqtamalarymen marapattaldy.
