Halyqaralyq Almaty marafonyna qatysýshylardy tirkeý bastaldy
ALMATY. QazAqparat- Búgin Halyqaralyq Almaty marafonyna qatysýshylardy tirkeý bastaldy. Bul týraly atalmysh sharany uıymdastyrýshy komıtettiń baspasóz qyzmetinen habarlady. Búgin, ıaǵnı 20 tamyzdan bastap www.almaty-marathon.kz resmı saıtynda 2015 jyldyń 15 sáýirine deıin on-laın tirkeý rásimi júretin bolady.
«Jyldan jylǵa «Almaty marafony» qaıyrymdylyq sharasy kóptegen nıettes jáne patrıot adamdardy óz baýyryna tartýda. «Birinshi bolý - batyldyq» uranymen tórtinshi ret ótkizilgeli otyrǵan Marafonǵa qatysýshylar 3 km, 10 km, 21 km, jáne 42 km 195 metr qashyqtyqtarǵa júgiredi. Aldaǵy marafonǵa jalpy 15 000-nan astam adam jınalady dep kútilýde. Sonymen qatar, korporatıvtik komandalar úshin «Ekıden» marafon estafetasy ótkiziledi», - delingen habarlamada.
Ereje boıynsha, marafonǵa aldyn-ala bastapqy jarna tólegen 10 jastan asqan kez kelgen adam qatysa alady. Eń tómengi bastapqy jarna - 1500 teńge ekendigin esterińizge salamyz. Jyl saıyn Almaty marafonyna qatysýshylardan jınalǵan qarajattyń barlyǵy iri qaıyrymdylyq jobalardy qoldaýǵa jumsalady. Mysaly, buǵan deıin ótken marafondardyń arqasynda aýyr naýqasqa shaldyqqan úsh kishkentaı qazaqstandyqtyń asa qymbat em alý sharasy tólendi, sonymen qatar Almatyda balalardyń sal (DTsP) aýrýyna shaldyqqan balalardyń qorshaǵan ortaǵa beıimdelýine arnalǵan shaǵyn akvatorııa salyndy. Almaty marafonynyń uıymdastyrýshy komıteti jınalǵan qarajatty maqsatqa saı paıdalanǵany jáne olardyń qalaı jumsalǵany boıynsha qujattardy usynýǵa kepildik beredi.
Marafon nátıjelerin tirkeý Qazaqstan úshin biregeı MyLaps atty árbir qatysýshyny baqylaý jáne onyń júgirý ýaqytyn esepteıtin júıe arqyly júzege asyrylady. Bul júıe halyqaralyq standarttarǵa tolyq jaýap beredi.
Aıta ketelik, «Birinshi bolý - batyldyq» Almaty marafony - Almaty qalasynyń ákimdigi, QR jeńil atletıka federatsııasy jáne World Class Almaty fıtnes-klýbynyń qoldaýymen 2012 jyldan beri ótkizilip kele jatqan halyqaralyq sport sharasy. 2013 jyldyń aıaǵynda Almaty marafony Marafondar men júgirýlerdiń halyqaralyq qaýymdastyǵynyń (AIMS) múshesi bolyp, áıgili Boston, Amsterdam, Nıý-Iork jáne t.b. marafondardyń dárejesine kóterildi.
