Halyq jınaǵan 807 tonna kómektiń 200 tonnasy Qostanaıǵa jetti - Dáýlet Káribek

NUR-SULTAN. QazAqparat – Qostanaı oblysynda órtten zardap shekken turǵyndarǵa kómek kórsetý úshin qurylǵan beketterge 807 tonna júk jınalyp, búginde onyń 200 tonnasy óńirge jetkizildi. Bul týraly «Amanat» partııasynyń hatshysy Dáýlet Káribek Ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Qostanaıdaǵy tilsiz jaýmen kúresip jatqan otandastarymyzdyń jaǵdaıyna barsha el alańdap otyr. Memleket basshysy Qasym-Jomart Kemeluly Qostanaıǵa baryp, órtten zardap shekken aýmaqty tikushaqpen aralap, zardap shekken azamattarmen kezdeskenin kórip, bilip otyrsyzdar. El basyna kún týǵan kezde «Amanat» partııasy eldiń partııasy retinde, Memleket basshysynyń qoǵamdyq tiregi retinde alǵashqy kúnnen bastap jumyla kirisip, gýmanıtarlyq kómek uıymdastyrýmen aınalysty. El azamattarynyń bári óz amanatyn bizdiń partııanyń gýmanıtarlyq beketterine tabystap, qazir 807 tonna kómek jıyldy. Onyń 100-200 tonnaǵa jýyǵy Qostanaıǵa jetkizildi», - dedi partııa hatshysy.

Sondaı-aq ol «Amanat» partııasy órttiń saldaryn joıýǵa atsalysatynyn jetkizdi.

«Gýmanıtarlyq kómektiń ishinde azyq-túlikten bólek, jeke gıgıenalyq quraldar men qurylys materıaldary da bar. Óıtkeni órt sóngennen keıin azamattardyń úıine kirýi mańyzdy. Oǵan bizdiń partııa músheleri de, «Jastar rýhynyń» eriktileri de mindetti túrde atsalysady», - dedi Dáýlet Káribek.

Eske salaıyq, Qostanaı oblysynyń Áýlıekól aýdanynda orman órti 2 qyrkúıek kúni bastaldy. Birneshe aýyldan 1841 adam evakýatsııalandy. Tilsiz jaý 86 jastaǵy turǵynnyń ómirin jalmady. 10 adam jaraqat aldy, onyń tórteýi qazir aýrýhanada jatyr.

Qostanaı oblysynda Ahmet Baıtursynulynyń 150 jyldyq mereıtoıyna oraılastyrylǵan saltanatty sharalar keıinge shegerildi. Іs-sharalarǵa Prezıdent Qasym-Jomart Toqaev baratyny josparlanǵan edi. Memleket basshysynyń baspasóz hatshysy Rýslan Jeldibaı Facebook-tegi paraqshasynda QR Prezıdenti orman órtine qaramastan Qostanaı oblysyna jumys saparymen baratynyn aıtty.

Búgin Q.Toqaev óńirge bardy. Órt bolǵan eldi meken turǵyndarymen kezdesken Prezıdent zardap shegýshilerge Úkimet eki aıda burynǵydan da jaqsy úıler salyp beretinin aıtty. Órtti aýyzdyqtaýǵa júzdegen tehnıka, myńdaǵan adammen birge 7 birdeı tikushaq tartyldy.

QR Tótenshe jaǵdaılar mınıstri ıÝrıı Ilın Qostanaı oblysyndaǵy ó rt adam qolynan boldy degen nusqany joqqa shyǵarmaıtynyn málim etti.

Zardap shekken qostanaılyqtarǵa kómek berý úshin biryńǵaı qoǵamdyq qor quryldy.

Óńirdegi jaǵdaı turaqtalǵansha, 3 myńnan astam oqýshy qashyqtan bilim alatyn boldy.

Áýlıekól aýdanyndaǵy órt saldarynan Amanqaraǵaı aýylynda 98 úı órtenip ketti.

Óńirde tótenshe jaǵdaı rejımi jarııalandy.

Úıleri órtenip ketken qostanaılyqtardyń banktegi nesıeleri jabylady.

Foto: amanatpartiasy.kz