Halyq jekeshelendirýdiń qalaı júrip jatqanyn kórýi kerek - Baqytjan Saǵyntaev

ASTANA. QazAqparat - Búgin ótken Úkimet otyrysynda Premer-Mınıstr Baqytjan Saǵyntaev memlekettik menshikti jekeshelendirýge qatysty tolyq aqparatty, sonyń ishinde osy salada baıaý jumys jasap jatqan oblystardy ashyq kórsetýdi tapsyrdy, dep xabarlaıdy QazAqparat tilshisi.

Premer-Mınıstrdiń aıtýynsha, shartty usynystardy jasaǵannan eshteńe shyqpaıdy. "Jekeshelendirý aıasynda tártip buzýshylyqtar kóp. Ásirese, jergilikti jerdegi jaǵdaıdy qatań baqylaýǵa alý qajet. Iá, usynystar jasaldy. Baqylaýǵa alý qajet, alyp tastaý kerek deımiz. Degenmen, bunyń barlyǵy - shartty nárse. Kelesi joly atalǵan tártip buzýshylyqtar taǵy qaıtalanady. Basqa bir mexanızmdi jasaý qajet sııaqty. Bálkim, barlyǵy bilsin dep jarııalap qoıamyz ba?! Máselen, bir jerde jekeshelendirý kezinde tártip buzýshylyqqa jol berilse, sony ashyq jarııalaýǵa bolady. Nysandy baǵalaý jumysyn ádeıi sozǵan jaǵdaıda da bárin ashyq kórsetý kerek. Áıtpese, biz baqylaýǵa alý qajet, baqylaýda ustaý qajet deımiz de, odan eshteńe ózgermeıdi", - dedi B.Saǵyntaev.

Osy oraıda QR Qarjy mınıstri Baqyt Sultanov atalǵan aqparattyń gosreestr.kz saıtynda jarııalanatynyn jetkizdi. Alaıda Úkimet basshysy Baqytjan Saǵyntaev barlyq málimetterdi xalyq oqıtyn resýrstarǵa shyǵarý qajettigine basa nazar aýdardy.

"Baqyt Turlyxanuly, gosreestr.kz-di kim qaraıdy? Siz qaraıtyn shyǵarsyz. Ákimdikter qaraıdy. Ony qoǵam qaraýy qajet. Sondyqtan xalyq oqıtyn saıttarǵa shyǵaryńyz. Jekeshelendirýdiń naqty qaı oblysta, qalaı júrip jatqanyn jáne qandaı tártip buzýshylyqtardyń bar ekenin bári kórsin. Toqsan saıyn árbir oblys, árbir xoldıng boıynsha naqty aqparatty jarııalap turý qajet. Áıtpese, búgin jalpy aqparatty aıttyq ta, kim jáne qalaı atqaryp jatqanyn túsinbeı qaldyq", - dep atap kórsetti QR Premer-Mınıstri.

Aıta keteıik, otyrys barysynda Baqytjan Saǵyntaev jekeshelendirýden túsken qyrýar qarjyny Ulttyq qorǵa ýaqytynda aýdarýdy tapsyrdy.

Al Ulttyq ekonomıka mınıstri Tımýr Súleımenov ınventarızatsııadan keıin jańa kásiporyndardyń sańyraýqulaqtaı qaptap ketetini úshin syn estidi.