Halyq vaktsına jaıly shyndyqty bilgisi kelse, sarapshylarǵa qulaq asýy kerek – Lázzat Eralıeva
NUR-SULTAN. QazAqparat – Medıtsına ǵylymdarynyń doktory, professor Lázzat Eralıeva koronavırýs vaktsınasy jaıly shyn aqparatty bilgisi keletin adamdar sarapshylarǵa qulaq asýy kerektigin málimdedi, dep habarlaıdy QazAqparat tilshisi.
«Eń aldymen, vaktsına degen dári emes ekenin atap ótkim keledi. Ol ınfektsııalyq aýrýlardy emdemeıdi. Biraq tarıhqa kóz júgirtip qaraıtyn bolsaq, álem aýyr indetterden vaktsınalaýdyń arqasynda ǵana arylǵan. Bir sózben aıtqanda sheshekten de, polıomıelıtten de vaktsına qutqarǵan. Al qazirgi ýaqytta koronavırýs ınfektsııasyna qarsy túrli «ańyzdar» da, áńgimeler de tarap jatyr. Búkil halyq ol jaıly shynaıy aqparatty bilgisi kelse, halyqaralyq jáne otandyq sarapshylarǵa qulaq asýy kerek», - dedi Lázzat Eralıeva ortalyq kommýnıkatsııalar qyzmetiniń alańynda ótip jatqan baspasóz máslıhatynda.
Onyń aıtýynsha, koronavırýs vaktsınasy – basqa vaktsınalar sekildi ımmýndy-bıologııalyq preparat.
Sondyqtan vaktsına saldyrǵan adamnyń boıynda qysqa merzimdik jaǵymsyz belgiler bolýy múmkin.
«Búkil álemde shyǵarylyp jatqan koronavırýs vaktsınalary quramdary jaǵynan ártúrli. Bul vaktsına adamǵa salynǵan kezde aǵzada antıdene jáne mmýndyq reaktsııa paıda bolady. Adam boıynda vaktsına ártúrli deńgeıde ótýi múmkin. Vaktsına saldyrǵan adamda tek jaǵymsyz belgiler paıda bolady degen pikir de - qate. Vaktsınadan keıingi qalypty jáne qalyptan tys jaǵdaı dep qana qaraý kerek. Vaktsınalaýdan keıin adamdardyń kóbi eshteńe sezbeı júre beredi», - dedi ol.
