Halyq únine qulaq asatyn memleket tujyrymdamasy Joldaýdyń negizine aınaldy - Laýra Demesinova

NUR-SULTAN. QazAqparat – QR Prezıdenti Qasym-Jomart Toqaevtyń byltyrǵy Joldaýy qanshalyqty tabysty oryndaldy? Memleket basshysynyń jańa Joldaýynan ne kútýge bolady? Bul týraly QR Prezıdentiniń «Bolashaq» stıpendıattary qaýymdastyǵynyń atqarýshy dırektory, «Astana» ÁKK UK» AQ Basqarma tóraǵasynyń keńesshisi Laýra Demesinova QazAqparat tilshisine bergen suhbatynda pikir bildirdi.

«Jarty jylǵa jýyq ýaqyt boıy tutas el úıde, karantınde boldy. Sondyqtan, eldegi jáne búkil álemdegi epıdemıologııalyq jaǵdaıǵa baılanysty qazaqstandyqtar Prezıdent Joldaýyn kútip otyr. Ótken jyly iske asyrylǵan Joldaýdyń negizgi máni – Halyq únine qulaq asatyn memleket tujyrymdamasy boldy. Bul – Qasym-Jomart Toqaev ekpin qoıǵan negizgi baǵyttardyń biri boldy. Halyq únine qulaq asatyn memleket tujyrymdamasynyń barlyq derlik tarmaqtary búginde belsendi júzege asyrylýda. Mysaly, indet kezinde kóptegen memlekettik organdar onlaın jumys rejımine kóshti. Olar kún saıyn azamattardyń ótinishterin qabyldap, halyqpen ózara árekettestik ornatty», - dedi sarapshy.

Onyń aıtýynsha, Qasym-Jomart Toqaev óziniń saılaýaldy baǵdarlamasynda Ulttyq qoǵamdyq senim keńesin qurýǵa jáne Prezıdenttik Jastar kadrlyq rezervin qalyptastyrýǵa aıryqsha mán berdi.

«Bul bizdiń elimizdegi eń jarqyn oqıǵa boldy. Ulttyq qoǵamdyq senim keńesine qoǵamǵa qajet, paıdaly adamdar engenin atap ótkim keledi», - dedi L. Demesinova.

Sonymen birge spıker Prezıdenttiń aldaǵy Joldaýynan ne kútetini týraly óz pikirimen bólisti.

«Memleket basshysy aıtarlyqtaı kúrdeli kezeńde Joldaý jasaǵaly otyr. Koronavırýs indetin eshkim kútken joq. Sondyqtan Qasym-Jomart Toqaev indet kezinde qabyldanýy tıis sharalardy aıtatyn shyǵar. Bul másele eldegi áleýmettik-ekonomıkalyq damýǵa áser etýi múmkin, óıtkeni jaǵdaı ózgeristiń qandaı qajet ekenin kórsetti», - dedi Laýra Demesinova.