«Halyq únine qulaq asatyn memleket»: Qostanaılyq polıtseıler esep berdi
Jyl basynan bergi nátıjeler jóninde Polıtsııa departamenti shtabynyń bastyǵy Meıram Qajkenov baıandady. Polıtsııa podpolkovnıginiń aıtýynsha, oblystyq vedomstvonyń jumysy 2019-2021 jyldarǵa arnalǵan Qazaqstan Respýblıkasynyń Іshki ister organdaryn jańǵyrtý jónindegi Jol kartasyna sáıkes júrgizilýde.
«Profılaktıkalyq is-sharalardyń arqasynda qylmystyq quqyq buzýshylyqtardy tirkeý 12,4% tómendedi. Maqsatty is-áreketterdiń arqasynda óńirde aýyr jáne asa aýyr qylmystardy ashý deńgeıi 84% deıin jaqsardy. Bopsalaýshylyq jasaýdyń barlyq faktileri zerttelip, sońyna deıin jetkizildi. Kisi óltirý, qaraqshylyq, kólik urlap ketý jáne densaýlyqqa aýyr zııan keltirý sııaqty qylmystardyń ashylýy 90% quraıdy. Páter urlyǵynyń 80% biryńǵaı reestrde tirkelgen. Qoǵamdyq oryndarda jaǵdaı tynysh. Qoǵamdyq oryndarda, sonyń ishinde kóshelerde jáne otbasylyq-turmystyq qatynastar salasynda jasalǵan qylmystar sany 20% azaıdy», - dedi Meıram Qajkenov. Ótken jylmen salystyrǵanda jol-kólik apattary 7,8% tómendedi. Degenmen, mal urlyǵynyń ashylýy 24% artty. Jyl basynan beri oblys tergeýshileri sotqa 4218 qylmystyq is jiberdi. Sotqa jiberilgen isterdiń úles salmaǵynyń kórsetkishi boıynsha Qostanaı oblysy ózge óńirler arasynda aldyńǵy orynda tur. Sonymen qatar, oblystyq Polıtsııa departamenti bastyǵynyń orynbasary Nyǵmet Ismaǵulov QR Іshki ister mınıstri Erlan Turǵymbaevtyń QR ІІM alqa májilisinde aıtylǵan tapsyrmalaryn oryndaý boıynsha negizgi mindetterdi atap ótti. Prezıdenttiń Qazaqstan halqyna Joldaýynda aıtylǵan tapsyrmalardy iske asyrý maqsatynda polıtsııanyń servıstik jumys modeline kóshti. Bul rette «Halyq únine qulaq asatyn memleket» tujyrymdamasy negizge alyndy, azamattarmen keri baılanys qamtamasyz etildi. Qostanaılyq tártip saqshylary qoǵamdyq pikir qalyptastyrý boıynsha eleýli jumystar júrgizgen. Jyl basynan beri oblystyq PD bastyǵy Beket Aımaǵambetov eki eseptik kezdesý ótkizse, «Nur Otan» partııasynyń fılıaldarynda 5 kóshpeli qabyldaý uıymdastyryldy. Toǵyz aı ishinde oblystyń bas polıtseıi 100-ge jýyq adamdy jeke qabyldady. Osy aralyqta barlyǵy 500-den astam azamattyń máselesi sheshildi. Keńes qorytyndysy boıynsha, departament apparaty qyzmetiniń, qalalyq, aýdandyq bólimder men polıtsııa basqarmalarynyń bastyqtaryna qaralǵan máseleler atap aıtqanda, qoǵamdyq tártip pen azamattardyń qaýipsizdigin qamtamasyz etý boıynsha naqty tapsyrmalar berildi.
