Halyq taýqymeti eshqashan qaıtalanbas úshin asharshylyq náýbetin máńgi este saqtaýymyz kerek - D. Nazarbaeva
ASTANA. 29 mamyr. QazAqparat -Halyq taýqymeti eshqashan qaıtalanbas úshin asharshylyq náýbetin máńgi este saqtaýymyz kerek.
Búgin Parlament Májilisinde Qazaqstandaǵy jappaı asharshylyqqa 80 jyl tolýyna baılanysty ótken dóńgelek ústel barysynda depýtat Darıǵa Nazarbaeva osylaı málim etti.
«1920 jyldyń aıaǵy men 1930 jyldyń basynda asharshylyq náýbeti Keńes odaǵy respýblıkalaryndaǵy mıllıondaǵan adamnyń ómirin qıdy. Qazaq halqynyń san ǵasyrlyq tarıhynda bul óte aýyr azapty kezeń boldy. 40 paıyz qazaq ashtyqtan kóz jumsa 600 myńnan astam adam elden tysqary ketti. Asharshylyq apatyna ushyramaǵanda qazaq sany 45-50 mln.-ǵa jetýshi edi. Endeshe osy máseleni tebirenissiz jetkizý qıyn», - dedi D. Nazarbaeva.
Sonymen qatar, depýtat HH ǵasyrda qazaq halqy buryn-sońdy kórmegen taýqymetke, qonys aýdarýǵa, ashtyqqa qýǵyn-súrginge soǵysqa dýshar boldy.
«Ǵasyr basynda úırenshikti ómir saltyn joǵaltyp, ǵasyr sońynda eń basty qundylyǵy tili men mádenıetinen qazaq halqy aıyryla jazdady. Dál osy sebepten biz táýelsizdikti ultty saqtaý men jańǵyrtýdyń túp negizi dep bilemiz. Bul memlekettilikti jańǵyrtýǵa eldiń óz erkimen damý qabilettiligin dáleldeýge tarıhı múmkindik berildi», - dedi D. Nazarbaeva.
Sóz sońynda depýtat ótkenniń qaıǵyly qasiretin eske alýmen qatar, sol arqyly keleshekti de oılaý kerektigine toqtalyp ótti. «El bolashaǵy bizdi ajyratatyn emes, biriktiretin tarıhı zerdeniń senimdi negizinde qalanady. Búgin ol Qazaqstanda ómir súrip jatqan barlyq etnostarǵa ortaq zerde. Búgin árbir qazaqtyń, árbir qazaqstandyqtyń júreginde qaıǵy dúrsili soǵyp, kókiregin qasiret kernep otyr. Biz osynaý náýbetti halyq taýqymeti eshqashan qaıtalanbas úshin este saqtaımyz! Ómir súrý jáne alǵa qadam basý úshin este saqtaımyz! Máńgi este saqtaımyz!», - dedi D. Nazarbaeva.
