Halyq táýelsizdigi úshin qalaı qýansa, sol táýelsizdikti qamtamasyz etetin Ata zańymyzdyń týǵan kúninde solaı qýaný kerek - Nurlan Orazalın
Ony Qazaqstan jazýshylar odaǵynyń tóraǵasy Nurlan Orazalın búgin Almatyda Konstıtýtsııa merekesine arnalǵan shara kezinde aıtty.
«Ár halyqtyń memleket bolyp týyn kóterip, irgesin bekitken kezde onyń ómir súrý saltyn, ǵurpyn, adamı qarym-qatynasyn jáne jalpy adamdardyń qoǵamdaǵy ornyn anyqtaıtyn uly zańy bolady. Ol zańdy biz sońǵy 20 jyldan astam ýaqyttyń ishinde Ata zań degen atpen atap júrmiz. Al halyqaralyq standarttaǵy aty - Konstıtýtsııa. Qazaqstan degen táýelsiz qazaq eliniń eń bir jarqyn kórinisi osy bas, negizgi zańynan baıqalady», - deıdi aqyn, dramatýrg N.Orazalın. Bizdiń qazirgi Konstıtýtsııamyz 1995 jyly jalpyhalyqtyq referendýmda qabyldandy. Al alǵashqysy 1993 jyly qabyldanǵan bolatyn. Nurlan Myrqasymulynyń aıtýynsha, bul halyqtyń júreginiń qalaýymen, qoldaýymen qabyldanǵan zań. Osy zańdy biz jyl saıyn eldiń týǵan kúni retinde el seniminiń, el nanymynyń jáne eldiń ishki memlekettik qurylymynyń beriktigin dáleldeıtin kún retinde ataımyz. Sondyqtan bul erekshe úlken ulttyq mereke. Konstıtýtsııada eń basty qundylyq - adam. Halyq táýelsizdigi úshin qalaı qýansa, sol táýelsizdikti qamtamasyz etetin Ata zańymyzdyń týǵan kúninde solaı qýaný kerek.