«Halyq tarıh tolqynynda» aıdary aıasynda 2170 materıal jaryq kórdi - QR Mádenıet jáne aqparat mınıstri

ASTANA. 24 qyrkúıek. QazAqparat - «Halyq tarıh tolqynynda» aıdary aıasynda 2170 materıal jaryq kórdi. Bul týraly búgin Aqordada QR Memlekettik hatshysy Marat Tájınniń tóraǵalyǵymen ulttyq tarıhty zerdeleý jónindegi vedomstvoaralyq jumys tobynyń úshinshi otyrysy barysynda QR Mádenıet jáne aqparat mınıstri Muhtar Qul-Muhammed aıtty.

Jyldyń basynda tarıhshylardyń basyn qosyp Qazaqstan tarıhynyń arǵy-bergi kezeńinde jınaqtalǵan jáne ult tarıhynyń shynaıy tarıhı oqýlyqtaryn jazý úshin berilgen tapsyrmalardyń negizinde kóptegen jumystardyń atqarylǵan atap ótken mınıstr: «Árıne, tarıhta jazylatyn dúnıe 1 jyldyń ne bolmasa birneshe aıdyń ishinde júzege aspaıtyndyǵy belgili. Qazir tarıhqa jyldam qosylǵan tarıhshylar búgin saq tarıhyna, erteń ǵun tarıhyna, búrsigúni túrki tarıhyna, arǵy kúni qazaq tarıhyna ámbebap shyǵarmalardy topyrlatyp jaza beredi. Olardyń barlyǵy ǵylymı aınalymǵa túspeıdi jáne ǵylym tarapynan úlken baǵa da almaıdy», - dedi ol. M. Qul-Muhammedtiń paıymynsha, sondyqtan da tarıhshylar búkil ómirin bir taqyrypty bastan-aıaǵyna deıin zertteýge arnaıdy. Al ony jazyp shyǵý úshin sheteldik muraǵattardaǵy qazaq tarıhyna qatysty qujattardy aldyryp, ǵylymı aınalymǵa túsirip zerttep, júıeleý qajet. Onsyz naqty nátıjege qol jetkizý múmkin emes. «Minekı, osyǵan baılanysty Mádenıet jáne aqparat mınıstrligi «Halyq tarıh tolqynynda» degen rýbrıkaǵa Qazaqstannyń barlyq buqaralyq aqparat quraldaryn jumyldyrdy. Atalǵan qysqa merzimniń ishinde, 5 maýsymnan búginge deıin 2 100 materıal jaryq kórdi. Olardyń 743 aqparat quraldarynda. Al 524 telearnalarda jarııalanǵan», - dedi ol.