Halyq tabysynyń stagnatsııasy qyr astynda tur – Memleket basshysy

ASTANA. QazAqparat – Qazaqstannyń tabys deńgeıi joǵary elder sanatyna ótýi úshin jyl saıyn 6% deńgeıinde ósim bolýy kerek. Prezıdent Qasym-Jomart Toqaev Úkimettiń keńeıtilgen keńesinde osyndaı tapsyrma berdi, dep habarlaıdy QazAqparat tilshisi.

«Byltyr bizdiń ekonomıkamyz nebári 3,2%, al bıylǵy 3 aıda 4,9% ósti. Sandar jaman emes, biraq bul sandar kóńildi qanaǵattandyryp, optımızm týdyrmaý kerek. Qosymsha ósim kózderin izdeý qajet. Úkimet ekonomıkalyq ósimdi qamtamasyz etýge órshil bolýy, ynta tanytýy kerek. Bul ýaqyttyń, qazirgi jaǵdaıdyń pármeni», - dedi Memleket basshysy.

Prezıdenttiń sózinshe, keıingi 10 jyldaǵy ekonomıkanyń ınertsııalyq ósý qarqyny elimizdi «ortasha tabys tuzaǵyna» túsip qalýǵa ákelgen.

«Qazir sapaly ekonomıkalyq ósimge qajetti berik irgetas qurmasa, halyq tabysynyń stagnatsııasy qyr astynda tur. Sarapshylardyń esepteýinshe, Qazaqstannyń tabys deńgeıi joǵary elder sanatyna ótýi úshin jyl saıyn 6% deńgeıinde, ıaǵnı aǵymdaǵy qarqynnan bir jarym ese joǵary ósýdi qamtamasyz etý qajet», - dedi Qasym-Jomart Toqaev.

Aıta keteıik, Úkimet úıinde Prezıdent tóraǵalyǵymen eldiń áleýmettik-ekonomıkalyq damý máseleleri jóninde keńes ótip jatyr.