Halyq tabysyn arttyrý – ákim orynbasarlary Jambyl oblysynyń tájirıbesin zertteýde
Halyq tabysyn arttyrýǵa baǵyttalǵan baǵdarlamanyń oryndalý barysyn tekserý úshin QR Premer-Mınıstriniń orynbasary Eraly Toǵjanov Jambyl oblysyna bardy. Jumys sapary atalǵan baǵdarlama boıynsha Baızaq aýdanynda qurylǵan «Qostóbe-2019» aýyl sharýashylyǵy kooperatıvin aralaýdan bastaldy.
Jambyl oblysynyń tájirıbesin zertteýge elimizdiń barlyq oblys ákimderiniń orynbasarlary keldi.
Pılottyq jobaǵa Baızaq aýdanynan Qostóbe aýyldyq okrýginiń turǵyndary qatysty (1,6 mlrd teńge bólindi). 178 turǵynnan quralǵan kooperatıvte 12 agrotehnıka satyp alyndy. Onyń bazasyndaǵy aýyl sharýashylyǵy maqsatyndaǵy jerlerdiń jalpy aýdany 401,0 ga quraıdy, pılottyq jobanyń ekinshi baǵyty (mal sharýashylyǵyn damytý) aıasynda kooperatıv quramyna kiretin «Almas» JK 7 bas jylqy, «Aıdyn» JK 9 bas iri qara mal satyp aldy.
Óz sózinde óńir basshysy Nurjan Nurjigitov jobany júzege asyrýdyń arqasynda Qostóbe aýyldyq okrýgindegi bir otbasynyń tabysy 4 esege artqanyn atap ótti. Sonymen qatar mal basynyń sany da 53,8% ósken. Barlyǵy 256 turǵyn jeke kásipker retinde tirkelip, 123 jańa jumys orny ashyldy. AÁK alýshylar sany 86% azaıdy. Turǵyndardyń 97% jeke qosalqy sharýashylyqtardy damytyp jatyr. Sondaı-aq kooperatıvterdi qurýmen arnaıy tehnıkanyń, jumys qoldarynyń jáne jerdi óńdeýge, egin jınaýǵa arnalǵan quraldardyń jetispeýshiligi máselesi kezeń-kezeńimen sheshiletinin atap ótti.
Eraly Toǵjanov aýyl sharýashylyǵy tehnıkalarynyń jaı-kúıimen tanysyp, oblys sharýalarymen ózekti máselelerdi talqylady, jergilikti atqarýshy organdarǵa aýyl sharýashylyǵy kooperatıvterine tolyq qoldaý kórsetýdi tapsyrdy.
Vıtse-Premer Memleket basshysynyń tapsyrmasy boıynsha ázirlengen Baǵdarlamany iske asyrýdyń mańyzyna toqtalyp, onyń, eń aldymen, halyqtyń tabysyn arttyrýǵa, sondaı-aq ekonomıkany ındýstrııalandyrý jáne ártaraptandyrý, kásipkerlikti damytýmen ushtasqan nátıjeli jumyspen qamtýǵa baǵyttalǵanyn atap ótti.
«Basty baǵyttardyń biri – ımportty almastyrý. Aýyldyq kooperatıvterde óndirilgen AÓK ónimderimen ımportty almastyrý jospary qajet. Sondaı-aq biz osy jobalardyń barlyǵy turǵyndarǵa qandaı paıda ákeletinin oılaýymyz kerek. 2025 jylǵa deıin ishki naryqty, qanttan basqasyn óz ónimderimizben júz paıyz qamtamasyz etý josparda bar», — dedi E. Toǵjanov.
Jumys sapary barysynda Vıtse-Premerge jaıylymdyq jerlerdiń tapshylyǵy máselesin sheshý boıynsha atqarylǵan jumystar barysy baıandaldy. Qazirgi ýaqytta bul – eń ótkir máselelerdiń biri. Ony sheshý bes baǵyt boıynsha júzege asyrylady.
