«Halyq súıiktisi» syılyǵyna úmitkerlerdi usyný bastaldy
«Dostar, «Halyqtyń súıiktisi» Ulttyq syılyǵynyń 10-shy merekelik kezeńi bastalady. Bıyl ony ekonomıkalyq daǵdarys pen Covid-19 pandemııasy kezinde ótkizgeli otyrmyz. Biz búginge deıin osy syılyqtyń ıegeri atanǵan Saltanat Rahymbekova, Jeken Qalıuly, Sansyzbaı Quttybaıuly, Qydyr ata (Janarsy Eńsepov) sekildi elimizdiń patrıottarynan aıyrylyp qaldyq. Jatqan jerleri jaryq bolsyn», - dep jazdy Ǵalym Baıtoq Facebook-paraqshasynda.
Qoǵamdyq qor basshysynyń habarlaýynsha, syılyqqa bıyl ózgeris engiziledi.
«Bıyl medıtsına qyzmetkerleri bizdiń ómirimizdi saqtap qalý boıynsha tańǵajaıyp dúnıeler jasaǵandyqtan, densaýlyq saqtaý salasynda bes qurmetti nomınatsııany belgiledik.
Olar: úzdik medıtsınalyq statsıonar, úzdik dárigerler ujym, úzdik medbıkeler ujymy, úzdik volonter men úzdik metsenat. Úzdik nomınatsııalardy burynǵydaı, uıymdastyrýshylar men qazylar anyqtaıdy», - deıdi ol.
«Halyq súıiktisi» syılyǵynyń bıylǵy nomınatsııalary:
1. Jyldyń úzdik muǵalimi;
2. Jyldyń úzdik dárigeri;
3. Jyldyń úzdik sportshysy;
4. Jyldyń úzdik qoǵam qaıratkeri;
5. Jyldyń úzdik telejúrgizýshisi;
6. Jyldyń úzdik mádenıet qaıratkeri;
7. Jyldyń úzdik parlamentarııi;
8. Jyldyń úzdik pýblıtsısi;
9. Jyldyń úzdik blogsalasynyń kóshbasshysy;
10. Jyldyń úzdik ınternet basylymy.
Negizgi nomınatsııalar boıynsha úmitkerlerdi usyný «Jyldyń halyq súıiktisi» («Narodnyı lıýbımets goda») resmı tobynda 18 qazan - 28 qazan aralyǵynda júrgiziledi.
«Usynar kezde úmitkerdiń 2020 jylǵy eńbegin eleseńizder deımiz. Sondaı-aq onyń qysqasha ómirbaıanyn qaldyrǵan durys. Daýys berý kezeńiniń merzimderi jaıly qosymsha habarlaımyz», - deıdi Ǵalym Baıtoq.
Eske sala ketsek, «Halyqtyń súıiktisi-2019» júldesine ıe bolǵan jeńimpazdar byltyr qarashada marapattalǵan bolatyn.Odan bir jyl buryn «Jyldyń úzdik aqparattyq ınternet-basylymy» nomınatsııasyn «QazAqparat» Halyqaralyq aqparat agenttigi jeńip alǵan edi.
