Halyq sany 50-ge jetpeıtin aýyl turǵyndary erikti negizde kóshirilmek
«Aýyldardy damytýdyń 2023-2027 jyldarǵa arnalǵan tujyrymdamasynyń aıasynda shaǵyn aýyldyq jerlerde (turǵyn sany 50 adamnan az) jáne damý áleýeti bar aýyldyq eldi mekender tizbesine kirmegen aýyldardaǵy turǵyndardyń turmys jaǵdaıyn jaqsartý úshin respýblıkalyq bıýdjetten qarjylandyrylatyn basqa eldi mekenderge kóshirý jóninde jaǵdaılar beriletin bolady. Osyǵan baılanysty jumys kúshiniń utqyrlyǵyn arttyrý úshin adamdardy erikti túrde kóshirý qaǵıdalaryna tıisti ózgerister engiziledi. Alaıda, aýyl turǵyndaryn bir aýyldan ekinshi aýylǵa qonystandyrý máselesi erikti túrde, ıaǵnı turǵyndardyń kelisilgen sheshimi boıynsha iske asyrylady», - dep jazylǵan QazAqparattyń saýalyna berilgen jaýapta.
Sondaı-aq Ekonomıka mınıstrligi «damý áleýeti tómen» aýyldardyń tizbesi qalaı jasaqtalatyny týraly aqparat berdi.
«Aýyldyq eldi mekenderdiń damý áleýetin aıqyndaý úshin eldi mekenderdiń basymdyq kórsetkishterin esepteý ádistemesi men modelderi ózektendirildi. Ólshemsharttar 15 jıyntyq kórsetkishti qamtıtyn mynadaı 4 blokqa bólinedi: demografııalyq, ınfraqurylymdyq, ekonomıkalyq jáne geokeńistiktik. Ádistemeni ázirleý kezinde 150-den astam baǵalaý kórsetkishteri, onyń ishinde halyq sanynyń ósý serpini, mal sharýashylyǵy men ósimdik sharýashylyǵynyń jalpy qosylǵan quny, halyqtyń jumyspen qamtylýynyń ósý serpini, olardyń iri eldi mekenderge jaqyndyǵy jáne t. b. qaraldy. Osyny negizge ala otyryp, aýyldyq eldi meknederdiń sanattary damý áleýeti joǵary, damý áleýeti ortasha jáne damý áleýeti tómen bolyp, jıyntyq ball negizinde aıqyndalady. Osy jıyntyq ball kórsetkishteri arqyly «damý áleýeti tómen aýyl» aıqyndalady», - delingen mınıstrlik jaýabynda.
