Halyq sanaǵynyń qorytyndysy jeltoqsan aıynda jarııalanady
ASTANA. Qarashanyń 16-sy. QazAqparat /Marlan Jıembaı/ - Halyq sanaǵynyń qorytyndysy jeltoqsan aıynda jarııalanady. Bul týraly búgin QR Statıstıka agenttiginiń tóraǵasy Álıhan Smaıylov baspasóz máslıhaty barysynda aıtty,
dep habarlaıdy QazAqparat.
«Sanaq qorytyndysyn daıyndap bolyp qaldyq. Degenmen bizdiń josparymyz boıynsha halyq sanaǵynyń nátıjesi jeltoqsan aıynda jarııalanatyn bolady», dedi ol.
Halyq sanaǵynyń aldyn ala nátıjelerin Elbasy N.Nazarbaev aǵymdaǵy jyly qyrkúıektiń 1-inde QR Parlamentiniń jalpy otyrysynda atap ótken bolatyn. Aldyn ala sanaq nátıjesi boıynsha, 10 jyl ishinde Qazaqstan halqy 14 mıllıon 900 myńnan 16 mıllıon 300 myń adamǵa kóbeıgen.
Qazirgi ýaqytta QR Statıstıka agenttigi negizgi kórsetkishter boıynsha aqparttar, qysqasha qorytyndylar ázirleýde. Ony aǵymdaǵy jyldyń sońynda jarııalaý josparlanǵan. Sonymen qatar atalǵan mekeme 2010-2011 jyldary sanaq qorytyndylaryn tolyǵymen daıyndaý jáne jarııalaý, al 2011 jyly osy sanaqtyń nátıjesi boıynsha halyqaralyq sarapshylardyń qatysýymen saraptamalyq esep daıyndaý men shyǵarý máselesin maqsat etip otyr.
