Halyq sanaǵy: Ulttyq statıstıka bıýrosynyń basshysy qandaı qatelikter ketip jatqanyn aıtty

NUR-SULTAN. QazAqparat – Ulttyq statıstıka bıýrosynyń basshysy Nurbolat Aıdapkelov ortalyq kommýnıkatsııalar qyzmetinde ótip jatqan bıfıngide onlaın sanaqqa qatysýshylardyń keıbir derekterdi qate toltyrylyp jatqanyna toqtaldy, dep habarlaıdy QazAqparat tilshisi.

«Halyq sanaǵyn ótkizý barysynda azamattardyń birqatar durys emes derekteri anyqtaldy. Sanaqtan ótkender saýalnamalardy toltyrýdyń bastapqy kezeńinde keıbir joldar avtomatty túrde toltyrylatynyn baıqaǵan shyǵar. Bul memlekettik derekter qorynan alynǵan tegi, aty, ákesiniń aty, jynysy jáne basqa da aqparat.

Mysaly, tórt er adam derekter bazasynda áıel dep kórsetilgeni belgili boldy. Úsh áıel er adamdar retinde kórsetilgen. Bul adamdarǵa mártebesin ózgertý úshin Halyqqa qyzmet kórsetý ortalyqtaryna júginý usynyldy», - dedi bıýro basshysy.

Sondaı-aq, ol halyqty onlaın sanaqpen keńinen qamtý maqsatynda «sanaq buryshtary» ashylyp jatqanyn eske saldy.

«Internetke jalǵanǵan kompıýteri bar bul buryshtarda aýmaqtyq statıstıka organdarynyń konsýltanttary jumys isteıdi. Úıde onlaın sanaqtan ótýge múmkindigi joq kez-kelgen osy buryshtarda sanaqtan óte alady. Olar halyqqa qyzmet kórsetý ortalyqtarynyń ǵımarattarynda, «Qazposhta» AQ fılıaldarynda, bilim berý mekemeleri men oıyn-saýyq ortalyqtarynda uıymdastyryldy. Jalpy, el boıynsha 3100-den astam osyndaı buryshtar ashyldy», - dedi Nurbolat Aıdapkelov.