Halyq sanaǵy ótti dep esepteýge bolady – Qaırat Kelimbetov
«Kez kelgen memleketke ulttyq statıstıka júıesi qajet, biz qansha azamatymyz bar ekenin, qyzmetimizdiń belgili bir bir aspektilerine qatysty jaǵdaı qandaı ekenin bilýimiz kerek. Sanaq on jylda bir ret júrgiziledi. Bul – BUU júıesi ustanatyn erejeler. Atap aıtqanda, biz eýropalyq statıstıka bıýrosymen tyǵyz jumys isteımiz. 10 jylda bir márte qolda bar derekterdi túzetý jáne rastaý júrgiziledi», - dedi Qaırat Kelimbetov «Habar» telearnasyndaǵy «Ulttyq múdde» baǵdarlamasynda.
Agenttik basshysy halyq sanaǵy kúrdeli ýaqytta júrgizilgenin atap ótti.
«Sanaqty qazir ótkizý qajet pe ózi?» degen másele kóterildi. Bir jaǵynan, ony keıinge qaldyrý múmkin bolmady, ekinshi jaǵynan, suraqtar nege kóp degender de boldy. Orta eseppen 50 suraq boldy, biraq keıbir baǵyttar boıynsha júzge jetti. Árıne, syn boldy, bizdiń kez kelgen memlekettik naýqanymyz halyqtyń ekiudaı sezimin týdyrady», - dedi Q. Kelimbetov.
Onyń aıtýynsha, Qazaqstannyń barlyq azamattarynyń 42% onlaın formatta sanaqtan ótken.
Ol sanaqtyń tsıfrlyq formatyna el halqy oń qabaq tanytty dep sanaıdy.
«Onlaın rejımde otbasynan bir adam barlyq suraqtardy toltyrdy. Men de ózim toltyrdym. Bar málimet daıyn bolsa, sanaqqa 15-20 mınýt ýaqyt ketti. Qazaqstan azamattarynyń 42% sanaqtan onlaın rejımde ótkeni bizdi qýantty, qalǵan azamattarmen ıntervıýerler sóılesti. Osyndaı úlken jumystyń atqarylǵanyna qýanyshtymyz. Barlyq epıdemıologııalyq talaptardy saqtaý jáne vaktsınalaý boıynsha talaptar joǵary boldy. Árıne, qandaı da bir máseleler týyndaǵanyn túsinemiz, al jalpy halyq sanaǵy sátti ótti dep aıtýǵa bolady. Sońǵy nátıjeler 2022 jyldyń shildesinde shyǵarylady. Aldyn ala qorytyndyny jeltoqsan aıynyń sońyna deıin jarııa etetin shyǵarmyz», - dep túsindirdi agenttik tóraǵasy.
