Halyq sanaǵy kezinde alaıaqtardan qalaı qorǵanýǵa bolady

ALMATY. QazAqparat - Ulttyq statıstıka bıýrosy Almaty qalasy boıynsha departamentiniń basshysy Aıdar Ábildabekov halyq sanaǵy kezinde alaıaqtardan qalaı qorǵanýǵa bolatynyn aıtty, dep habarlaıdy QazAqparat tilshisi.

Departament basshysy sanaq kezinde almatylyqtarǵa ıntervıýerlerdiń kıimine nazar aýdarýǵa keńes berdi.

«Alaıaqtardan qalaı qorǵanýǵa bolady? Aıta keteıin, ıntervıýerler 1-30 qazan aralyǵynda úılerdi aralaıdy. Olarda Almaty statıstıka departamentiniń fotosýreti men móri bar kýáligi, sharf, sondaı-aq ulttyq sanaq sımvolıkasy bar sómke jáne derekterdi engizýge arnalǵan elektrondyq planshet bolady. Qujattyń durystyǵyn sanaq.gov.kz saıtynda tekserýge bolady. Ol úshin kýáliktiń nómirin «ıntervıýerdi izdeý» arnaıy izdeý jolyna engizý jáne aqparattyń shyndyqqa sáıkestigin tekserý qajet», - dedi ol.

Sonymen qatar, spıker saýalnamadaǵy suraqtarǵa toqtaldy.

«Qazaqstandyqtardyń jaýaptary zerdelenedi, olar boıynsha respondentterdiń jalpy jaǵdaıy týraly bilýge bolady. Alynǵan málimetter tekserilip, óńdeledi. 2022-2023 jyldary on jınaqta jarııalanatyn qorytyndy shyǵarý josparlanǵan jáne ol kelesi kórsetkishterdi qamtıdy: ulttyq quram, kóshi-qon, bilim, neke jáne otbasy, úı sharýashylyǵy, jumyspen qamtý, tabys jáne ómir súrý qarajatynyń kózderi, turǵyn úı sıpattamalary», - dedi Aıdar Ábildabekov.