Halyq sadaqa qabyldaý termınaldaryna daıyn ba
Qazaqstan musylmandary dinı basqarmasynyń baspasóz hatshysy Aǵabek Qonarbaıulynyń aıtýynsha, sadaqa qabyldaý termınaldary pılottyq joba aıasynda Astana men Almaty qalalarynda, sondaı-aq oblystardyń ortalyq meshitterinde ornatylǵan bolatyn. «Búginde osy tájirıbege qatysty eki máseleni atap ótýge bolady. Birinshiden, termınaldarda tehnıkalyq aqaýlyqtar bar. Atap aıtqanda, usaq aqsha qabyldanbaıdy, túbirtek ýaqytynda shyqpaı qalady jáne taǵysyn taǵy. Ekinshiden, meshitke kelgen jamaǵat Alla razylyǵy úshin bergen aqshalaı sadaqasyn jarııa etkendi, ıa bolmasa, termınal arqyly túbirtegin alyp jatqandy qalamaıdy. Óıtkeni bizdiń asyl dinimizde, jalpy qazaq halqynyń tanym-túsiniginde «oń qolyń bergen sadaqany sol qolyń bilmesin» degen ádemi naqyl bar. Bul sóz Paıǵambardyń (s.ǵ.s.) hadısinen alynǵan. Sol sebepti sadaqa berýshiler óziniń saýapty amalyn basqalardyń bilmegenin, ıaǵnı ózi men Allanyń arasyndaǵy qulshylyqtyń qupııa bolyp qalǵanyn qalaıdy», - dedi A.Qonarbaıuly QazAqparat tilshisine bergen suhbatynda.
Onyń aıtýynsha, meshitterdiń janynan qurylǵan arnaıy komıssııalar termınal arqyly túsetin sadaqany baqylaıdy. Komıssııany quramyna birneshe adam kiredi. Olar qujattardy rásimdep, esep-qısabyn jasaıdy. «Degenmen, búginde halqymyz ondaı jańa tehnologııalarǵa jatyrqap qaraıdy. Sol sebepti sadaqa qabyldaý termınaldaryn tolyqqandy iske qosý úshin áli de birneshe jyl qajet. Qazirdiń ózinde termınaldar barlyq meshitterde istep turǵan joq. Óıtkeni keıbir jerlerde tehnıkalyq máseleler týyndady. Endi, aldaǵy ýaqytta osy elektrondy júıege tolyǵymen kóshemiz be, joq pa, ony ýaqyttyń ózi kórsetedi. Sosyn halyqtyń kózqarasy da óz septigin tıgizedi», - dep atap kórsetti A.Qonarbaıuly.
