Halyq polıtsııa qyzmetindegi reformadan jetkilikti deńgeıde habardar bolmaı otyr - N. Ábdirov
ASTANA. QazAqparat - Qazaqstan halqy jergilikti polıtsııa qyzmetindegi reformalar baǵytynda júrgizilgen sharalardan jetkilikti turde habardar emes. Bul týraly búgin Májilistegi jergilikti polıtsııa qyzmeti taqyrybyna arnalǵan Úkimet saǵatynda baıandama jasaǵan Zańnama jáne sot-quqyqtyq reformalar komıtetiniń tóraǵasy Nurlan Ábdirov málim etti.
«Bizdiń ótinishimiz boıynsha «Nur Otan» partııasynyń Qoǵamdyq saıasaty ınstıtýty elimizdiń 10 aýmaǵynda saýal júrgizgen bolatyn. Sonyń nátıjesinde sarapshylar da osyndaı qorytyndyǵa keldi. Halyqtyń polıtsııa qyzmetindegi reformalardan habarsyz ekeni belgili bolyp otyr», - deıdi depýtat. Onyń aıtýynsha, saýalnamaǵa tilshiler, mılıtsııa ardagerleri, joǵarǵy oqý oryndarynyń oqytýshylary, taldaý ortalyqtarynyń, úkimettik emes sektorynyń taldaýshylary, memlekettik qyzmetkerler jáne ǵalymdar qatysqan.
«Olardyń pikiri boıynsha, qalyptasqan jaǵdaıdyń basty sebebi, ishki ister organdary men jergilikti atqarýshy organdarynyń halyqpen túsindirý jumysynyń júrgizilmegendigi kórinedi. Jergilikti polıtsııanyń aǵymdaǵy jumysy buqaralyq aqparat quraldarynda tıisti túrde óz kórinisin tappaǵan. Halyq, jergilikti bılik jáne polıtsııa arasyndaǵy túbegeıli jańa qatynastarynyń mán-maǵynasy halyqqa túsindirilmegen. Sondyqtan jergilikti polıtsııanyń jumysy áýeli Qazaqstannyń árbir turǵynynyń naqty qaýipsizdigin qamtamasyz etýge, qajet bolǵan jaǵdaıda polıtsııa halyq úshin ne istep otyrǵany týraly jergilikti turǵyndarǵa esep berý qajet ekenin jetkizýimiz kerek», - dedi N. Ábdirov.
