Halyq pikirine qarap, áli de túıini tarqamaǵan túıtkilder baryn kórýge bolady - QR Prezıdenti
«Qańtar aıynda konstıtýtsııalyq reforma jasaý týraly bastama kótergenimdi bilesizder. Osyǵan oraı tıisti zań jobasy daıyndalyp, ótken bir aı boıy búkilhalyqtyq talqylaýdan ótti. Oǵan barlyq saıası partııalar men qoǵamdyq uıymdar, ǵylymı jáne shyǵarmashylyq birlestikter, belsendi azamattar bári de atsalysty. Qoǵamdyq saıası ortada 2 myńnan astam, ǵylymı-shyǵarmashylyq ortada 50-den astam respýblıkalyq deńgeıdegi basqosý ótti. Óńirlerde konstıtýtsııalyq reformaǵa qatysty 10 myńǵa jýyq shara ótkizilip, oǵan 2 mıllıonnan astam adam qatysty. Másele aqparat quraldarynda qyzý talqylanyp, ózderińiz estigendeı 6 myńǵa jýyq jańa usynys engiziledi. Telearnalar árkimniń konstıtýtsııalyq reformaǵa qatysty oılaryn ashyq bildirý úshin tolyq múmkindik jasady», - dedi QR Prezıdenti.
Osy rette Memleket basshysy keıbir baptar azamattardyń erekshe nazaryn aýdaryp, úlken qoǵamdyq rezonans týdyrǵanyn basa aıtty.
«Jalpy, ulttyq talqylaý barysynda 6 myńnan astam usynys jınaldy. «Keńesip pishken ton kelte bolmas» degen elimizde sóz bar. Bul pikirler bizde áli de túıini tarqamaǵan túıtkilder bar ekendigin aıqyn kórsetti. Usynystardyń kópshiligi toptalyp, Konstıtýtsııa úshin kerek baptary qabyldandy jáne de kóp usynystar zańdarǵa ózgeris jasaý máselesine qatysty bolady. Ony Úkimet jaǵynan jáne sizder qaraıtyn bolasyzdar. Olardy keıinirek qarastyrýǵa bolady. Sonymen qatar aldaǵy jumystardyń qandaı bolýy kerek ekendigin aıqyndap berdi. Meniń tapsyrmam boıynsha jumys toby usynystardyń mańyzdylaryn eskere otyryp, tıisti zań jobasyn daıyndady. Ol zań jobasyn biz meniń tóraǵalymmen jumys tobynyń otyrysynda talqylaǵynymyzdy, qorytyndysyn jasaǵanymyzdy bilesizder», - dedi Elbasy.
