Halyq pen bızneske ishki tólemderdi ulttyq valıýtada kidirissiz júrgizýge múmkindik jasalady
«Qarjy júıesiniń turaqtylyǵyn qamtamasyz etý boıynsha Memleket basshysynyń tapsyrmasyn oryndaý úshin Qazaqstan Ulttyq banki ınternet jumysynyń turaqsyzdyǵyna jáne Almaty men basqa da aımaqtarda antıterrorlyq operatsııalardyń jalǵasyp jatqanyna baılanysty bank júıesi jumysyn qalpyna keltirý isi halyq pen bıznes úshin áleýmettik mańyzdylyǵy men birinshi kezektegi qajettilikke oraı kezeń-kezeńimen oryndalatynyn habarlaıdy», - delingen UB málimetinde.
1. 2022 jylǵy 10 qańtarda memlekettik bıýdjet pen qarjy sektorynda tólemderdi teńgemen júrgizý úshin, sonyń ishinde azamattardyń shotyna aılyq eńbekaqy men járdemaqyny jáne zeınetaqyny aýdarý úshin «QR UB Qazaqstan bankaralyq esep aıyrysý ortalyǵy» RMK tólem júıesi shtattyq rejımde jumys isteıtin bolady. Bul óz kezeginde eń aldymen elimizdiń barlyq aýmaǵynda halyq pen bızneske ishki tólemderdi ulttyq valıýtada esh kidirissiz júrgizýge múmkindik beredi.
2. Qarjy uıymdarynyń tıimdiligin qoldaý maqsatynda 2022 jyldyń 10 qańtarynan bastap Qazaqstan qor bırjasynda (KASE) REPO operatsııa naryǵy men memlekettik baǵaly qaǵazdar naryǵyn teńgede qurylymdaý qamtamasyz etiledi.
3. Almaty men basqa da aımaqtarda jaǵdaıdyń turaqtalýyna, sondaı-aq baılanys arnalarynyń rettelýine qaraı Qazaqstan qor bırjasynyń valıýta alańynda saýda-sattyqty qaıta jandandyrý jáne halyqaralyq tólemder men aýdarymdardy ótkizý boıynsha tıisti sharalar qabyldanady.
«Osyǵan baılanysty ekinshi deńgeıli bankter men quzyretti uıymdardyń aıyrbas pýnkterinde qyzmetkerler men klıentterdiń qaýipsizdigi úshin jáne aıyrbas pýnkteriniń óz qalpynda saqtalýy úshin jumysy ýaqytsha toqtatylady», - delingen Ulttyq bank habarlamasynda.