Halyq partııasynyń atynan depýtattyqqa kandıdattar Aqsý ferroqorytpa zaýytynyń jumyskerlerimen kezdesti

NUR-SULTAN. QazAqparat – 24 jeltoqsanda Qazaqstan Halyq partııasynyń atynan QR Parlamenti Májilisiniń depýtattyǵyna kandıdattar Gaýhar Nuǵmanova men Nurbolat Temirov Pavlodar oblysy Aqsý qalasynyń ferroqorytpa zaýytynyń jumyskerlerimen kezdesti, dep habarlaıdy QazAqparat.

Kezdesý barysynda olar saılaýaldy baǵdarlamasynyń negizgi tujyrymdamasyn túsindirip ótti. Jumysshylar quqyǵyn qorǵaıtyn táýelsiz kásipodaqtarǵa qoldaý kórsetý kerektigin atap ótti.

Keıin kandıdattar qala turǵyndarymen de kezdesý ótkizdi. Saılaýshylarmen bolǵan kezdesýde partııa múshesi halyqtyń kóp bóligin tolǵandyryp otyrǵan ózekti máselelerge toqtaldy. Atap aıtqanda, tegin bilim, medıtsına, turǵyn úı jáne taǵy da basqa máseleler kóterildi.

Kezdesý barysynda G.Nuǵmanova Qazaqstanda azamattardyń jaıly jáne qaýipsiz jaǵdaıda ómir súrý sapasynyń eń tómengi standarttaryn zańnamalyq túrde bekitý qajet ekenin atap ótti.