Halyq partııasynan Májilis mandatyn kimder ıelendi

ASTANA. QazAqparat - Qazaqstan Halyq partııasynyń ortalyq keńsesinde partııa tóraǵasy Ermuhamet Ertisbaevtyń basshylyǵymen Saıası bıýronyń kezekten tys otyrysy ótti, dep habarlaıdy QazAqparat.

Basqosý barysynda partııalyq tizim boıynsha VIII shaqyrylymdaǵy Parlament Májilisiniń depýtattyǵyna saılanǵan kandıdattarǵa depýtattyq mandat bólindi.

«Kandıdatýralar alqa taldaýyna túsip, uzaq talqylandy», – dedi QHP tóraǵasy.

Saıası bıýro músheleri depýtattyq top quramyn jasaqtaýǵa qatysty sheshim qabyldaǵan kezde áıelder men jastarǵa jáne múmkindigi shekteýli jandarǵa bólingen mindetti kvotany erekshe nazarda ustady.

Nátıjesinde Májilis saılaýyna partııalyq tizimmen usynylǵan tájirıbeli saıasatkerler Magerram Magerramov pen Irına Smırnova, kópbalaly analar birlestiginiń jetekshisi Gaýhar Tanasheva, Paralımpıada oıyndarynyń qatysýshysy, múgedek adamdardyń quqyǵyn qorǵaýshy Kenjeǵul Seıtjan jáne jastar kvotasy boıynsha Islam Suńqar syndy kandıdattar mandatqa ıe boldy.

Aıta keteıik, Ortalyq saılaý komıssııasy jarııalaǵan saılaý qorytyndysyna sáıkes, Qazaqstan Halyq partııasy 5 paıyzdyq mejeni eńserip, Parlament Májilisine ótti. Saılaýshylardyń daýysy Halyq partııasyn 5 parlamenttik mandatpen qamtamasyz etti.