Halyq óz bolashaǵy úshin daýys berip jatyr – halyqaralyq baıqaýshy

NUR-SULTAN. QazAqparat – Búgin elimizde ótip jatqan referendým protsesin qadaǵalaý úshin TMD elderinen bir top baıqaýshy keldi. Olar saıası sharany syrttaı baqylaıdy. Osy oraıda sheteldik baıqaýshylardyń biri TMD Parlamentaralyq Assambleıasynyń bas hatshysy Dmıtrıı Kobetskıı tilshilerge suhbat berdi, dep habarlaıdy QazAqparat tilshisi.

«Biz, bir top baıqaýshy Qazaqstanǵa juma kúni keldik. Kele sala referendýmǵa daıyndyq jumysynyń barysymen tanystyq. Zańdylyq jaǵyn qadaǵaladyq. Ortalyq saılaý komıssııasynyń saıası sharaǵa tyńǵylyqty daıyndalǵanyn kórip otyrmyz. Aýmaqtyq referendým ýchaskeleriniń de belsendiligi baıqalady», - dedi Dmıtrıı Kobıtskıı BAQ ókilderine.

Onyń aıtýynsha, elordadaǵy №111 referendým ýchaskesinde halyqtyń belsendiligi tańǵy saǵat 7-den bastaldy.

«Halyq óz bolashaǵy úshin, ózgerister úshin daýys berip jatyr. Referendým nátıjesi eldiń bolashaq damýyna oń áserin tıgizedi degen senimdemin. Bizdiń baıqaýshy retindegi búgingi mindet – referendým kezinde zańnyń saqtalýyn qadaǵalaý. Kúni boıy 120 ýchaskeni aralap, jumysyn baıqaımyz. Men baıqaýshy retinde Qazaqstanda buǵan deıin de birneshe ret boldym. Daıyndyq tıisti deńgeıde júredi. Referendým Konstıtýtsııaǵa ózgerister men tolyqtyrýlar engizý maqsatynda ótkiziledi. Al Konstıtýtsııanyń negizi áldeqashan qalanyp qoıǵan. Biraq zaman jáne halyqtyń talabyna qaraı ýaqyt óte kele ózgerister kerek», - deıdi ol.

Búgingi referendýmdy qadaǵalaýǵa TMD Parlamentaralyq Assambleıasynan barlyǵy 8 elden 57 baıqaýshy keldi.