Halyq ótkizetin súttiń 90 paıyzyna senim joq - Sút odaǵy
2020 jyldyń 1 qańtarynda Kedendik odaq aıasyna ónimder engizýdiń 21 jáne 33-tehnıkalyq reglamentteri Qazaqstan aýmaǵynda da kúshine enedi. Onyń biri tamaq ónimderiniń qaýipsizdigin rettese, ekinshisi sút jáne sút ónimderiniń qaýipsizdigin qamtamasyz etýi tıis. Buǵan deıin atalmysh reglamentti engizý Qazaqstan úshin keıinge shegerilip kelgen bolatyn. Osy shegerý merzimi aıaqtalýyna baılanysty Qazaqstannyń sút odaǵy sút ónimderiniń qaýipsizdigin arttyrýǵa baǵyttalǵan jol kartasyn usynyp otyr.
«Bul qujatty Aýyl sharýashylyǵy mınıstrliginiń barlyq tıisti qurylymdary maquldady. Jol kartasyn daıyndaýdaǵy maqsatymyz – otandyq sút ónimderin sheteldik balamalarymen básekege qabiletti deńgeıge kóterý», - deıdi Qazaqstan sút odaǵynyń atqarýshy dırektory Vladımır Kojevnıkov.
Sút odaǵynyń ókili aq ónimderdiń qaýipsizdigi boıynsha uıymdasqan sharýashylyq qurylymdar men kásiporyndarǵa eshqandaı syn taǵa almaıtynyn aıtady. Al qosalqy sharýashylyqtarǵa senim azaıǵan.
«Qazaqstanda 150-den astam sút óńdeýshi kásiporyn bar. Olar jyl saıyn 1,5 mln tonna shıkizat qabyldaıdy. Onyń teń jartysyn uıymdasqan qojalyqtar men sút fermalary berse, ekinshi jartysyn qarapaıym halyq ótkizip otyr. Osy halyq ótkizetin súttiń 90 paıyzyna senim joq. Óıtkeni, aýyldaǵy el osydan 300 buryn sıyrdy qalaı saýsa, áli kúnge deıin solaı istep keledi. Al 300 jylda ekologııa da, jemshóp bazasy da, tehnologııa da ózgerdi. Osynyń bári qosalqy sharýashylyqtar ótkizetin súttiń qaýipsizdigin qubyltyp tur. Túrli indetter men mıkrobtar, ýly hımıkattar malǵa egilgen dári arqyly sútke túsip jatyr», - degen Vladımır Kojevnıkov bul iske BUU-nyń Azyq-túlik jáne aýyl sharýashylyǵy uıymynyń mamandary tartylǵanyn aıtady. Osylaısha BUU qoldaýy arqyly sút óndirý qaýipsizdiginiń qarapaıym erejelerin rolıkter men mýltfılmder arqyly elge nasıhattaý jobasyn qolǵa alynǵan.
Jol kartasy eki kezeńde júzege asyrylmaq. Birinshi kezeńde, ıaǵnı, 2020 jyldyń basyna deıin Sút odaǵyna múshe kásiporyndar osy jol kartasy boıynsha jumys istep bastaıdy. Al ekinshi kezeńde, ıaǵnı, 2021 jylǵa deıin qalǵan sút óńdeýshi kásiporyndary jol kartasyna qosylatyn bolady.
«Jol kartasy salany jetildirý tetikterin bir arnaǵa toǵystyratyn qujattar kesheni ǵana. Bul karta aýyl halqyn sút ótkizýge nemese kásiporyndardy elden sút qabyldaýǵa tyıym salmaıdy», - dedi Vladımır Kojevnıkov.
