Halyk Ormany jyldyń eń iri ekologııalyq jobasy bolyp tanyldy
ASTANA. KAZINFORM – «Halyk Ormany» jobasy 2025 jyly Qazaqstanda bastalǵan eń iri áleýmettik baǵyttaǵy orman egý baǵdarlamasy retinde tanyldy. Bul – Ranking.kz analıtıkalyq basylymnyń jasaǵan qorytyndy nátıjesi. Onda orman alańdarynyń ósý dınamıkasy men elimizdiń tabıǵı kapıtalynyń qalpyna kelýine áser etilgen úlesi qarastyrylǵan.
Orman alańdarynyń ulǵaıýy – turaqty úrdis
Ranking.kz málimetterine sáıkes, keıingi jyldary Qazaqstanda orman alańdarynyń ulǵaıýy turaqty úrdiske aınalǵan. Tabıǵı-klımattyq shekteýler men orman aýmaqtarynyń az bolýyna qaramastan, bul oń ózgeris júıeli memlekettik baǵdarlamalar men bıýdjetten tys resýrstardy tartý arqyly júzege asyrylyp otyr.
Analıtıkalyq materıalda bul úderiste memlekettik organdarmen seriktestikte júzege asyrylyp jatqan iri jeke jáne qaıyrymdylyq bastamalarynyń róli arta túskeni aıtylady.
«Halyk Ormany» – kólemi men qamtýy boıynsha eń iri bastama
Atalǵan reıtıngke saı, «Halyk Ormany» jobasy otyrǵyzý kólemi, iske asyrylý aýmaǵy jáne baǵdarlamanyń uzaq merzimdi sıpaty sekildi negizgi kórsetkishter boıynsha eldegi ormandy qalpyna keltirýdiń eń iri jeke bastamasy retinde erekshelenedi.
Joba aıasynda bes jyl ishinde 4 mıllıonnan asa kóshet otyrǵyzý josparlanǵan, sonyń ishinde Іle-Alataý ulttyq parki, «Semeı ormany» tabıǵı rezervaty jáne elordanyń jasyl beldeýi sııaqty ekologııalyq turǵydan mańyzdy aýmaqtardy qamtylady. Baǵdarlama QR Ekologııa jáne tabıǵı resýrstar mınıstrligimen birlesip júzege asyrylady.
Orman qoryn qalpyna keltirýge júıeli qadam
Keltirilgen málimetterge sáıkes, eń úlken ekologııalyq nátıje aýqymdy ári júıeli jobalar arqyly ǵana bolady. Demek, mundaı jobalar aǵash otyrǵyzýmen shektelmeı, jumys kezeń-kezeńimen júrgiziledi, kóshetterdiń otyrǵyzylýy baqylaýda bolady jáne keıin de kútim jasalyp turady. Bul – bir rettik aktsııa emes, aýqymdy joba ýaqyt óte turaqty orman alqabyn qalyptastyrýǵa múmkindik beredi.
Sondaı-aq, sholýda qaıyrymdylyq jobalar men jeke bastamalardyń qatysýy memlekettik orman sharýashylyqtarynyń jumysyn kúsheıtip, basym aýmaqtarda ormandy qalpyna keltirý protsesin jedeldetýge yqpal etetini atap kórsetilgen.
Ekologııalyq turaqtylyq – uzaq merzimdi basymdyq
Ranking.kz dereginshe, Tımýr Qulybaevtyń Halyk qorynyń «Halyk Ormany» jobasy búginde Qazaqstandaǵy orman otyrǵyzý boıynsha eń iri bastama sanalady. Jobany iske asyrý el kóleminde orman alqaptaryn kóbeıtý, ekojúıelerdi qalpyna keltirý jáne Qazaqstannyń uzaqmerzimdi ekologııalyq turaqtylyǵyn qalyptastyrý baǵytyn kúsheıtedi.
Klımattyq syn-qaterler kúsheıip, antropogendik júkteme artqan qazirgi kezde mundaı bastamalar – Qazaqstannyń tabıǵı kapıtalyn saqtaýǵa jáne kóbeıtýge baǵyttalǵan júıeli jumystyń mańyzdy bóligi.
Buǵan deıin Almaty oblysy aýmaǵyndaǵy Іle‑Alataý ulttyq parkinde «Halyk ormany» ekologııalyq jobasynyń jańa kezeńi bastalǵany týraly jazǵan edik.