Halyk ormany: Іle‑Alataý ulttyq parkinde jobanyń jańa kezeńi bastaldy
ALMATY. KAZINFORM – Almaty oblysy aýmaǵyndaǵy Іle‑Alataý ulttyq parkinde «Halyk ormany» ekologııalyq jobasynyń jańa kezeńi bastaldy. Keshe ǵana boz jýsan men qýraǵan shóp basqan aımaqta búginde shyrsha kóshetteri tizilip tur.
Naýqannan qozǵalysqa aınalǵan joba
Bıyl kóktemde Tımýr Qulybaevtyń «Halyk» qaıyrymdylyq qory búkil eldi qamtyǵan GreenAct ekologııalyq chellendjin bastaǵan edi. Sol kezde myńdaǵan oqýshy, erikti jáne kompanııa qyzmetkerleri parkterdi tazalap, qaldyqtardy suryptap, kógaldandyrý jumystaryn atqardy.
Osydan keıin qor ekologııalyq baǵytta jumysyn jalǵastyryp, Qazaqstannyń jasyl aımaqtaryn qalpyna keltirý men keńeıtýge arnalǵan «Halyk ormany» uzaqmerzimdi baǵdarlamasyn qolǵa aldy. Qordyń bul bastamasyna Ekologııa jáne tabıǵı resýrstar mınıstrligi qoldaý bildirip, ózara bekitilgen memorandým aıasynda birlesip júzege asyra bastady.
Ekologııalyq joba – naýqanshylyq emes
Ekologııa jáne tabıǵı resýrstar vıtse‑mınıstri Nurbek Sharbıev tabıǵatty qorǵaý – bir rettik bastamamen shektelmeıtinin aıtady. Bul adamdardyń ómir saltyna aınalýy tıis.
- Tabıǵatqa janashyrlyq tanytpaıynsha, ekonomıkalyq ósim de uzaqqa barmaıdy. «Halyk ormany» jáne osyndaı jobalar – ekologııalyq mádenıetti ómirimizdiń tabıǵı bóligine aınaldyrý jolyndaǵy mańyzdy qadam, - deıdi vıtse‑mınıstr.
Bes jyldyq jospar
Tabıǵı ekojúıelerdi qalpyna keltirýge jáne elimizdiń óńirlerinde jańa jasyl aımaqtar qalyptastyrýǵa baǵyttalǵan joba 5 jylǵa eseptelgen. Ony iske asyrýǵa qor 1 mıllıard teńge bólip otyr. Osy aralyqta eldiń úsh óńirinde – Abaı oblysynda, Іle‑Alataý ulttyq parkinde jáne Astanadaǵy jasyl beldeýde – 4 mıllıonnan asa aǵash otyrǵyzý josparlanǵan.
Sharalar «Semeı ormany» rezervatynan bastaldy. Alapat órtten zardap shekken aýmaqqa 800 myńnan asa jas qaraǵaı otyrǵyzyldy. Bul ormandy qalpyna keltirý baǵytyndaǵy jumystarǵa qosylǵan aıtýly úles bolmaq.
Kelesi kezeń – Іle‑Alataý ulttyq parkinde júzege asady. Ondaǵy 5 gektar aýmaqqa 14 myń shyrsha egilmek. Aıta keteıik, Іle-Alataý memlekettik ulttyq tabıǵı parki Úkimet qaýlysymen 1996 jylǵy 22 aqpanda Almaty oblysynyń Qarasaı, Talǵar jáne Eńbekshiqazaq aýdandary sheginde Qaskeleń, qala mańyndaǵy jáne Túrgen orman sharýashylyqtarynyń bazasynda qurylǵan. Maqsat - biregeı landshafttardy, ósimdikter men janýarlar dúnıesin saqtaý, týrızm men demalys úshin jaǵdaılardy jaqsartý, rekreatsııalyq paıdalaný jaǵdaıynda tabıǵı keshenderdi saqtaýdyń ǵylymı ádisterin ázirleý jáne engizý.
Bolashaqqa salynǵan ınvestıtsııa
«Halyk» qory Qamqorshylyq keńesiniń múshesi Daýren Sartaev jobanyń uzaqmerzimdi qundylyǵyn erekshe atap ótti.
- Ár egilgen aǵash – qalanyń tynysyna, tutynýdan góri qamqorlyq jasaý ádetine salynǵan ınvestıtsııa. «Halyk ormany» – tabıǵatty aıalaý mádenıetin qalyptastyratyn mektep. Bul – bizden keıin de qalatyn mura, - deıdi.
Qazaqstan dalasy ósimdikter men janýarlar dúnıesine baı, biraq óndiris pen ýrbanızatsııa keıde tabıǵatqa keri áserin tıgizetini belgili. Sondyqtan «Halyk» qaıyrymdylyq qory tabıǵatqa degen qamqorlyq pen sanaly kózqaras, keler urpaq aldyndaǵy jaýapkershilikpen jasyl jelekti aýmaqtardy kóbeıtý arqyly ornyqty damýǵa úles qosýdy maqsat tutady.