Halyk ormany: 4 mıllıon aǵash otyrǵyzý úshin 1 mlrd teńge ınvestıtsııa quıyldy
ASTANA. KAZINFORM — «Semeı ormany» memlekettik tabıǵı rezervaty, Іle-Alataý ulttyq tabıǵı parki jáne elordanyń jasyl beldeýi aýmaqtaryna 4 mıllıonnan astam aǵash pen kóshet otyrǵyzylady. Tımýr Qulybaevtyń Halyk qory men Ekologııa jáne tabıǵı resýrstar mınıstrligi osy týraly yntymaqtastyq memorandýmyna qol qoıdy. «Halyk ormany» jobasy aıasynda qorǵa 1 mlrd teńge ınvestıtsııa salyndy.
Ulttyq basymdyq
«Qorshaǵan ortaǵa uqypty, jaýapty ári janashyrlyqpen qaraý — ulttyq ıdeologııamyzdyń ajyramas bóligine aınalýǵa tıis». Qazaqstan Prezıdenti Qasym-Jomart Toqaev halyqqa Joldaýynda osylaı degen edi.
«Halyk ormany» jobasy Memleket basshysy aıqyndaǵan mindettermen úndesip, «Taza Qazaqstan» ulttyq tujyrymdamasyn júzege asyrýǵa úles qosady. Qor bastamasy — tabıǵatty aıalaý men jaýapkershilikke negizdelgen baǵyttyń jalǵasy.
Jobanyń maqsaty men máni
Basty mindet — ekologııalyq turǵydan osal aımaqtarda jańa orman alqaptaryn qurý, órtten zardap shekken ekojúıelerdi qalpyna keltirý, bıoalýantúrlilik pen ekologııalyq tepe-teńdikti saqtaý.
Keıingi jyldardaǵy qaıǵyly oqıǵalardy eskersek, bul joba erekshe mańyzǵa ıe. Eske salsaq, 2023 jylǵy maýsymda «Semeı ormany» tabıǵı rezervatynda Qazaqstan tarıhyndaǵy eń alapat orman órti boldy: 60 myń gektardan asa aýmaq órtendi. Bul jaǵdaı orman alqaptaryn qalpyna keltirý men ekologııalyq apattardyń aldyn alý sharalaryn kúsheıtýdiń qanshalyq mańyzdy ekenin kórsetti.
Memlekettik qoldaý
Ekologııa jáne tabıǵı resýrstar mınıstri Erlan Nysanbaev «Halyk ormany» jobasy týraly bylaı deıdi:
— Qorshaǵan ortany qorǵaý — tek bir salanyń mindeti emes. Bul — memlekettiń, bıznestiń jáne qoǵamnyń ortaq isi. Biz qazir tabıǵatty saqtaý jolynda sheshýshi qadamdar jasaýǵa tıispiz. «Halyk ormany» — sondaı ıgi bastamalardyń biri. Joba tek órtten zardap shekken aımaqtardy qalpyna keltirip qoımaıdy, sonymen qatar elimizdiń jasyl qoryn kóbeıtip, klımattyq tepe-teńdikti saqtaýǵa yqpal etedi. Bul bastama — eldiń strategııalyq tańdaýy. Orman otyrǵyzý — ǵasyrlyq is, onyń jemisin urpaq kóredi.
Halyqaralyq kontekst
Álem boıynsha kógaldandyrý klımattyń ózgerýine qarsy kúrestegi negizgi quraldardyń biri retinde qarastyrylady. Jańa ormandar bıoalýantúrlikti saqtap qana qoımaı, Jerdiń «ottektik tepe-teńdigine» de úles qosady. «Halyk ormany» jobasyn júzege asyra otyryp, Qazaqstan jahandyq ekologııalyq qozǵalysqa súbeli úles qosady.
Qordyń ustanymy
«Halyk» qory Qamqorshylyq keńesiniń múshesi, Halyk Bank Basqarma tóraıymy Úmit Shaıahmetovanyń aıtýynsha, bul qarjy tek aǵash otyrǵyzýǵa ǵana emes, sonymen qatar jasyl aımaqtardy kútip-baptaýǵa jáne ekologııalyq bilim berý jobalaryna da jumsalmaq.
— Biz úshin Qazaqstannyń tabıǵı baılyǵyn saqtaý asa mańyzdy. «Halyk ormany» — ekologııalyq qaýipsizdik pen el bolashaǵyna salynǵan ınvestıtsııa. Biz memleketpen jáne qoǵammen kúsh biriktirip, ult pen bolashaq urpaqtyń saýlyǵy úshin eńbek etip kelemiz. Bul joba — keler urpaqqa qaldyratyn eń qymbat muramyzdyń biri. Bul jaı ǵana aǵash otyrǵyzý emes, Qazaqstan tabıǵatyn qorǵaýǵa jasalǵan mańyzdy qadam. Qordyń qoldaýy men qoǵamnyń belsendiligi arqasynda elimizdegi ekologııalyq jaǵdaıdy jaqsarta alamyz dep senemin, — dedi ol.
Júıeli jumys
«Halyk ormany» jobasy — qordyń júıeli ekologııalyq jumysynyń jalǵasy. 2025 jylǵy kóktemde GreenAct ekochellendji iske qosylyp, azamattar men uıymdardyń úzdik ekologııalyq bastamalaryn qoldaýǵa baǵyttaldy. Jobaǵa eldiń jetekshi kompanııalary men belsendileri qatysyp, ondaǵan tyń ıdeıa usyndy.
Buǵan deıin qor GreenAct aıasynda myńdaǵan qazaqstandyqty biriktirgen ekologııalyq aktsııalar ótkizgen bolatyn. Іle-Alataý ulttyq parkinde Ekinshi dúnıejúzilik soǵystyń batyrlaryna arnap 3 500 shyrsha, al Almatynyń Ortalyq saıabaǵynda alma aǵashtary otyrǵyzyldy. Bul sharalar ekologııalyq mádenıetti damytý men turaqty damý qaǵıdattaryn dáripteýdiń mańyzdy qadamyna aınaldy.
Úndeý
«Halyk» qory volonterler men tabıǵatqa beıjaı qaramaıtyn barlyq azamatty «Halyk ormany» jobasyna qosylýǵa shaqyrady. Árbir adamnyń qoldaýy eldegi jasyl aımaqtardyń artýyna jáne ekologııany saqtaýǵa jeke úles qosýǵa múmkindik beredi.