Halyq narazy bolsa, salmaımyz - Qanat Bozymbaev AES jaıynda

NUR-SULTAN. QazAqparat - Energetıka mınıstri Qanat Bozymbaev «Qazaqstanda atom elektr stansasy salyna ma?» degen suraqqa jaýap berýden jalyqqanyn aıtyp, máseleni túsindirýge tyrysty, dep habarlaıdy QazAqparat tilshisi.

«AES týraly máseleni 100 ret aıttym. 101-shi ret aıtaıyn. Halyq durys túsinýi kerek. Bul máseleni zertteý bir másele, atom elektr stansasyn salý - basqa másele. Biz ýran óndirýden álemdi birinshi oryndamyz. Ýrandy óndiretin memleket retinde ulttyq kompanııa dúnıe júzinde birinshi orynda. Qazir bizdiń «Qazatomónerkásip» kompanııasy jańa zaýyttyń qurylysyn aıaqtap otyr. Ol zaýyt osyndaı AES-terge arnalǵan otyn quramalarymen bes qytaılyq úlken atom stansasyn qamtamasyz etedi. Biz ony ári qaraı damytyp, qarap otyrmyz. Shıkizatty satamyz dep biz qazir búkil ýrandy satyp júrmiz. Al kelesi qadamǵa shyqsaq, qyrýar qarjy tabamyz. Sondyqtan, osy máseleni zerttesek, odan men eshqandaı qarama-qaıshylyq kórip otyrǵan joqpyn», - dedi Qanat Bozymbaev OKQ-da ótken baspasóz máslıhatynda.

Mınıstr qazirgi tańda Qazaqstan aýmaǵynda AES salý týraly eshqandaı sheshimniń joqtyǵyn aıtyp ótti.

«Zertteý bar. Ony qaraý kerek. Zertteý kerek. Tıisti kompanııalarmen kelissózder júrgizilýi tıis. Pikir almasý kerek. Basqasha ınterpretatsııamen kópke málimet berilýi múmkin. Keıbir saıasatkerler óz tehnologııalaryn bizge satamyz dep, keıde sony aıtady (...) Halyq narazy bolsa, biz eshqashan ondaı nysandy salmaımyz. Zań boıynsha biz halyqtyń pikirin bilýimiz kerek. Ekinshiden, Prezıdent Semeı qalasynda saparmen bolǵanda «Halyqtyń pikirin bilemiz. Eger kerek bolsa, ol saýalnama retinde, kerek bolsa referendým jasaımyz» dedi. Sondyqtan, Prezıdent aıtsa - biz ne isteımiz? Tyńdaımyz ba? Tyńdaımyz ǵoı!» - dep sózin túıindedi Qanat Bozymbaev.

Eske sala ketsek, keshe halyqqa esep berý kezinde Qanat Bozymbaev Qazaqstanda Atom elektr stansasyn salý josparda joq ekenin málim etken bolatyn.