Halyq naqty ózgeristerdi kútip otyr – Ermuhamet Ertisbaev
«Bizdiń partııamyzdyń ıdeıasy – sotsıalızm. «Qaıdaǵy sotsıalızm?» dep suraýlaryńyz múmkin. Mysaly, skandınavııalyq sotsıalızm bar. Norvegııa osydan jarty ǵasyr buryn ǵana Soltústik teńizden munaı men gazdyń orasan zor qoryn tapqan. Al qazir árbir norvegııalyqtyń arnaıy shotynda orta eseppen 238 myń eýro jatyr. Jańadan velosıped oılap tabýdyń qajeti joq. Bizde ıdeıa bar, sol ıdeıaǵa qadam basyp kelemiz. Bul turǵydan alǵanda, eger 19 naýryzda mıllıondaǵan adam Halyq partııasynyń baǵdarlamasyn qoldasa, bul ıdeıa materıaldyq kúshke aınalady. Biz bul iske izgi nıetpen qaraımyz», - dedi Ermuhamet Ertisbaev KTK telearnasynda ótip jatqan televızııalyq pikirsaıysta.
Sondaı-aq, ol pikirsaıysqa qatysýshylardy eldiń orta jáne uzaqmerzimdi damý keleshegi týraly paıymyn pash etýge úndedi.
«Túsinesizder me, biz qazir tsıfrlar men faktilerge, alýan túrli ýádelerge erip ketýimiz múmkin. Al pikirsaıys degen - pikir almasyp, ıdeıa bólisetin alań. Sondyqtan, osy turǵydan alǵanda pikirsaıysqa qatysýshylardyń bárine qaırylǵym keledi – paıymdar men ıdeıalar arqyly elimizdiń orta jáne uzaqmerzimdi damý keleshegi týraly paıymdarymyzdy pash eteıik», - dedi Ermuhamet Ertisbaev.
Onyń aıtýynsha, halyq naqty ózgeristerdi qalaıdy.
«19 naýryzda kimge daýys berseńizder de, ózińiz bilesiz. Tek azamattyq, konstıtýtsııalyq paryzyńyzdy oryndasańyz boldy, eń bastysy – saılaýǵa kelińizder!», - dedi partııa tóraǵasy.
Sondaı-aq, ol pikirsaıys kezinde ózge partııa ókilderiniń saýalyna jaýap bere otyryp, kásipkerlerdi erkine qoıa berý kerektigin aıtty.
Ermuhamet Ertisbaevtyń pikirinshe, ákimder men sýdıalardy saılaıtyn júıe engizilse, eldegi ahýal túbegeıli ózgermek.
Aıta keteıik, búgin KTK telearnasynda Parlament Májilisi saılaýyna qatysatyn 7 saıası partııa ókilderi arasynda pikirsaıys ótip jatyr.
Debatqa «Amanat» partııasynan Aıdos Sarym, «Aýyl» halyqtyq demokratııalyq partııasynan Jıgýlı Daırabaev, «Respublica» partııasynan Dınara Shúkijanova, Qazaqstan halyq partııasynan Ermuhamet Ertisbaev, «Baıtaq» jasyldar partııasynan Aınur Sábıtova, «Aq jol» demokratııalyq partııasynan Dánııa Espaeva, al Jalpyulttyq sotsıal-demokratııalyq partııasynan Ashat Rahymjanov qatysýda.
