Halyq múlkin memleket qajettiligi úshin alý qanshalyqty zańdy

NUR-SULTAN. QazAqparat – QR Ádilet mınıstrligi qazaqstandyqtardyń múlkin memleket qajettiligi úshin alý zańdylyǵyn túsindirdi, dep habarlaıdy QazAqparat tilshisi.

«Sottyń sheshiminsiz eshkimdi de óz múlkinen aıyrýǵa bolmaıdy. Zańmen kózdelgen erekshe jaǵdaılarda memleket muqtajy úshin múlikten kúshtep aıyrý onyń quny teń baǵamen ótelgen kezde júrgizilýi múmkin (QR Konstıtýtsııasynyń 26-babynyń 3-tarmaǵy)», - dep málimdedi mınıstrlikten QazAqparattyń saýalyna oraı.

Vedomstvonyń atap ótýinshe, bul ereje elimizdiń Konstıtýtsııasynda, Azamattyq kodekste jáne ózge de zańnamalyq aktilerde bar.

«Óz kezeginde Memleket basshysy usynǵan jer halyqtyń menshigi týraly ereje Qazaqstan halqynyń irgeli jáne konstıtýtsııalyq quqyqtaryn kúsheıtýge baǵyttalǵan mańyzdy qadam sanalady jáne qalaı bolǵanda da jeke menshik ınstıtýtyna qatysy joq», - dep atap ótedi Ádilet mınıstrliginen.