Halyq minip júrgen árbir ekinshi kólik elimizde qurastyrylǵan
Ústimizdegi jyldyń toǵyz aıynyń qorytyndysy boıynsha, Qazaqstan aýmaǵynda jalpy quny 140,9 mlrd teńgeni quraıtyn 22 709 avtomobıl (jeńil, júk avtokólikteri, avtobýs, arnaıy avtokólikter jáne tirkemelerdi qosa alǵanda) jasap shyǵarylǵan.
«Otandyq avtozaýyttar ótkizgen kólik sany jyl basynan beri 20 644-ke jetti. Bul byltyrǵy jylmen salystyrǵanda 58,2%-ǵa joǵary. Al «QazAvtoÓnerkásip» kásiporyndarynyń naryqtyq úlesi ótken jyldyń osy kezeńinde 36,8% bolsa, bıyl 47,3%-ǵa deıin ósti. Halyqtyń óz elimizde shyqqan avtomobılderdi satyp alý úshin jumsaǵan qarjysy 119,7 mlrd teńgeni qurdy, bul bir jyl burynǵy kórsetkishten 59,6%-ǵa joǵary. Qoldanystaǵy avtomobılderdiń árbir ekinshisi ózimizde qurastyrylǵan», - dedi «QazAvtoÓnerkásip» Qazaqstannyń avtomobıl salasyndaǵy kásiporyndary odaǵynyń basqarma tóraǵasy Oleg Alferov.
Onyń aıtýynsha, búginde elimizde jeńil avtomobıl óndirisi 82,6%-ǵa ósip, 21 137-ge jetti. Sol sııaqty qańtar-qyrkúıek aılarynyń qorytyndysy boıynsha, avtobýs shyǵarý kólemi 1,9 ese qysqarsa, al júk avtomobılderiniń óndirisi 17,2%-ǵa deıin tómendegen.
2018 jyldyń qyrkúıek aıynyń nátıjesi boıynsha qazaqstandyq kásiporyndardyń konveıerlerinen 3 244 avtokólik shyqty. Bul kórsetkish 2017 jyldyń nátıjesinen 2,2 ese artyq.
Elimizde qurastyrylǵan avtomobılderdi satý boıynsha «AZIıA AVTO» AQ aldyńǵy qatardan kórindi. Kompanııa 11 802 kólikti ótkizgen. Bul otandyq tehnıkanyń jıyntyq ótiminiń 57,2%-y. Ekinshi orynda - «SaryarqaAvtoÓnerkásip» JShS. Ol 7 866 kólikti ótkizgen. Budan ári otandyq avtoóndirýshiler ónimin ótkizý reıtınginde «SemAZ» JShS, «KAMAZ-Injınırıng» AQ , «Hyundai Trans Auto» JShS jáne «Daewoo Bus Kazakhstan» JShS ornalasqan.
