Halyq mekemelerdiń tabaldyryǵyn tozdyrmaı, járdemaqyny ýaqtyly alýy tıis - Ómirzaq Shókeev

TÚRKІSTAN. QazAqparat - Búgin Túrkistan qalasynda Elbasy Nursultan Nazarbaevtyń «Nur Otan» partııasynyń XVIII sezinde bergen tapsyrmalaryn oryndaý boıynsha partııanyń oblystyq fılıalynyń aktıv májilisi ótti. Jıynda óńirdegi partııa fılıalynyń ókilderi men basqarma basshylary, zııaly qaýym ókilderi el áleýetin kóterý baǵytynda pikir almasty, dep habarlaıdy QazAqparat tilshisi.

Jıynda Túrkistan oblysynyń ákimi Ómirzaq Shókeev turǵyndardyń áleýmettik jaǵdaıyn kóterý baǵytyndaǵy jumysty júıeleýdi tapsyrdy.

«On jyldaı ýaqyt salyp ózderińizben qaıta qaýyshqanyma qýanyshtymyn. Túrkistandy damytý baǵytynda jumystar atqarylyp jatyr. Biz sol jumystardy jalǵastyryp qana qoımaı, qarqynyn arttyramyz. Elbasymyz Nursultan Nazarbaevtyń qazaqstandyqtardyń ál-aýqatyn arttyrý baǵytyndaǵy tapsyrmalary Túrkistan oblysynyń áleýmettik-ekonomıkalyq damýyna tikeleı áser etedi. Sebebi oblysymyz kópbalaly analar sany boıynsha respýblıkada aldyńǵy qatarda tur. Ár balaǵa 21 myń teńge kóleminde járdemaqy berilýi - jerlesterimizge oń yqpalyn tıgizetini sózsiz. Biz osy áleýmettik kómektiń berilý sharty men merzimi tolyq júıelengenshe oblysta áleýmettik zertteý júrgizip, kómekke muqtaj otbasylardy anyqtaýymyz kerek. Árbir aýdan, qala ákimderi ózderi basqaratyn aýmaqtaǵy kópbalaly jáne az qamtylǵan otbasylardy anyqtasyn. Sol turǵyndardy kómekpen jáne jumyspen qamtý sharalary kúsheıtilsin. Jumys tobyna «Nur Otan» partııasynyń ókilderi de kirip, tizimniń ádil jasalýyn qadaǵalaýy qajet. Turǵyndar áleýmettik kómek alý úshin mekemelerdiń tabaldyryǵyn tozdyrmaı, járdemaqyny ýaqtyly alýy tıis», - dedi Ómirzaq Shókeev.

Sonymen birge, óńir basshysy bıýdjettik mekemelerdegi eń tómengi jalaqy alatyn jumysshylardyń sany men olarǵa jumsalatyn qarjyny tolyq esepteý jóninde tapsyrma berdi. Jergilikti atqarýshy organdarda qyzmet etetin mamandardyń jalaqysyn kóterý úshin uıymdardyń shyǵystaryn ońtaılandyrý jáne únemdeý sharalary atqarylyp, faktorly-ball shkalasy júıesi engiziletinin aıtty.

Sondaı-aq kópbalaly otbasylardy turǵyn úımen qamtý, tómen paıyzben baspana berý baǵytynda jumystar júıelenedi. Óńirdegi qurylys jumystaryna otandyq materıaldar qoldanylyp, jergilikti turǵyndardyń jumyspen qamtylýy da baqylaýda bolady. Oblys basshysy jurtshylyqty osy baǵytta birlesip jumys isteýge shaqyrdy.

«Árbir aýdan-qalanyń damý tujyrymdamasy qaıtadan júıelensin. Oblystaǵy gazdandyrý, aýyz sýmen qamtý, ınfraqurylym salalary boıynsha atqarylatyn isterdi tikeleı qadaǵalap, eldiń áleýetin kóteretin jumystarmen tikeleı aınalysamyn. Elbasymyz usynǵan «Baqytty otbasy», «Aýyl - el besigi», «Qutty meken» jobalary boıynsha da naqty ári sapaly usynystar qajet. Ataýly áleýmettik kómektermen másele sheshilmeıdi. Biz sol úshin oblystyń barlyq aýmaǵynda jumys oryndaryn ashýǵa kúsh salýǵa mindettimiz. Bul jumystardyń basy-qasynda «Nur Otan» partııasy da júredi», - dedi aımaq basshysy Ómirzaq Shókeev.