Halyk qory: Jambyl oblysynda FIFA standarttaryna saı fýtbol akademııasy ashylady
ASTANA. KAZINFORM – Tarazda FIFA standarttaryna saı keletin fýtbol akademııasy salynady. Aýmaǵy segiz gektar bolatyn sport kesheni qurylysynyń bastaýy retinde kapsýla qalandy.
Jobany Jambyl oblysynyń ákimdigi men Qazaqstan fýtbol federatsııasy birlese júzege asyrady. Bas seriktes – qurylysqa 3,5 mlrd teńgege deıin baǵyttaıtyn Tımýr Qulybaevtyń Halyk qory.
Kapsýla qalaý rásiminde Jambyl oblysynyń ákimi Erbol Qarashókeev jobanyń mańyzdylyǵyn atap ótti.
- Bul joba – Jambyl oblysynyń sporty tarıhynda jańa kezeń bastalǵanynyń belgisi. Biz jastarymyzǵa barlyq jaǵdaıdy jasaýǵa kúsh salyp jatyrmyz. Fýtbol akademııasy – jaı ǵana ınfraqurylym emes, balalardy armandaryna jaqyndata túsý múmkindigi. Bizdiń mindetimiz – ár talant ıesine ózin kórsetýge múmkindik berý, - dedi ol.
Akademııa óńirlerde jastar sportyn damytý jobalary ishindegi eń irileriniń biri bolmaq. Ol aımaqta fýtboldy damytýǵa jáne bolashaq kásibı oıynshylardy daıyndaýǵa jańa múmkindikter ashatyny aıtylyp otyr. Jobanyń negizgi seriktesi Halyk qorynyń atqarýshy dırektory Ǵalymbek Jaqsylyqov aımaqtardaǵy ózge sport jobalary týraly da aıtyp ótti.
- Biz óńirlerde sporttyń damýyna naqty múmkindikter paıda bolýyn qalaımyz. Akademııa – sonyń biri. Qor budan da basqa jobalardy júzege asyryp jatyr: aýyl balalaryna arnalǵan AUYL SPORT, Jańaózen jáne ózge de qalalarda sport keshenderin salý, buqaralyq sportqa jáne sport ınfraqurylymyn jaqsartýǵa qoldaý bildirý, - dedi ol.
Jambyl oblysy sporttyń boks, kúres jáne fýtbol túrlerinen dańqty. Alaıda, jergilikti sportshylarǵa tolyqqandy kásibı daıyndyq úshin jaǵdaı jetkiliksiz edi. Endi jańa akademııada qajettiliktiń bári qamtylmaq: oıynshylar men jattyqtyrýshylarǵa arnalǵan jataqhana, oqý aýdıtorııalary, medıtsınalyq jáne ońaltý bloktary, jabyq jáne ashyq alańdar, sondaı-aq myń kórermenge eseptelgen trıbýna. Nysandardyń barlyǵy FIFA jáne UEFA talaptaryna saı bolady. Qazaqstan fýtbol federatsııasynyń bas hatshysy Davıd Lorııanyń aıtýynsha, Halyk qorynyń qoldaýymen salynatyn akademııa ulttyq fýtboldyń damýyna qosylatyn súbeli úles bolady.
- Bolashaq kásibı oıynshylar men chempıondar dál osy jerden shyǵatynyna senimdimiz, - dedi ol.
Sharaǵa qatysqan mektep oqýshylarynyń qýanyshynda shek bolmady. Olardyń bolashaq akademııany kóz aldaryna elestetip turǵanyn baıqaý qıyn emes.
Aıta keteıik, akademııada 14–17 jastaǵy qyzdar men bozbalalar oqıdy. Olar tórt topqa bólinedi. Bul trenerlerdiń ár sportshyǵa jetkilikti kóńil bólip, tolyqqandy sport baǵytyn qalyptastyrýyna múmkindik beredi.
Qurylys alańynda qazir daıyndyq jumystary júrip jatyr. Atap aıtqanda, nysannyń aýmaǵy boıynsha belgiler qoıylyp, qurylys merzimi naqtylanbaq.
